Yvon im Kreis der Liebe Verspilltheet an der Sprooch a mat de Wierder

Dräi Museker a Kënschtler aus dem däitschen Nordrhein-Westfalen bréngen elo Ufank November den italienesche Indianersummer heihinner. Mam Numm "Yvon im Kreis der Liebe" liwwere si net nëmmen d'Wäermt, déi d'Wieder ewechgerappt huet, mee liwweren och den Album vun dëser éischter Novemberwoch.

Tom Dockal / cbi

YVON
Foto: Yvonne Schmedemann

Däitschsproocheg Popmusek huet, zanterdeem et Popmusek gëtt, e Komplex. An zwar deen, Schlager ze sinn. Dat ass verständlech, kënnt déi Form vun einfacher däitscher Ënnerhalungsmusek jo net aus den Äsche vum leschte grousse Krich, dee viru bal 75 Joer op en Enn koum. Dobäi dierft dee Komplex awer guer net existéieren. Well Pop ass Schlager. A Schlager ass Pop. An dat hunn dräi däitsch Museker verstanen.

Déi dräi Museker sinn: de Jacques Palminger, Allroundkënschtler an een Drëttel vu Studio Braun; de Carsten Meyer, besser bekannt als Erobique an d'Theaterschauspillerin a Sängerin Yvon Jansen. An hiert Synonym op d'Behaaptung, Pop ass Schlager a Schlager ass Pop, heescht "Yvon im Kreis der Liebe".

"Guten Morgen Marco"

Datt d'Yvon manifestement am Krees, dem Hamsterrad vun der Léift ze stieche schéngt, ass op der éischter Single ze héieren, déi d'Plack ugekënnegt huet. De Marco, hie lieft zu Berlin, schrauft sech der Yvon an hir Kreisgedankensystem a gëtt zu engem reegelrechte Kreesgedankeproblem. An en nervt a si gëtt en awer net lass aus dem Kapp.

Jiddweree kennt e Marco. Mee jiddweree kennt och ee Song, deen en net méi héiere kann oder wëllt, ob gutt oder schlecht, ass emol net de Problem, an awer dréit sech dee Song stonnelaang engem am Kapp ronderëm. D'Kraaft vu Pop. Oder Schlager.

Déi Liichtegkeet, mat där den Trio Jansen/Meyer/Palminger d'Mauer erofschléit, déi tëschent Pop a Schlager ze bestoe schéngt, ass bewonnerenswäert. Op "Yvon im Kreis der Liebe" kommen einfach emol 70 Joer däitsch Popgeschicht zesummen. Sief dat der Jansen hir Stëmm, déi natierlech jiddwereen un d'Knef erënneren deet. Wann och méi vun der Attitüd hir wéi vun der Déift.

13 Joer sinn zanter dem éischte Schlag a Plackeform vergaangen. Deemools war d'Kombo nach en Theaterprojet, wann een esou wëllt, a si hunn op der Bühn vum Maxim Gorky Texter aus dem Public quasi zäitgläich vertount. Ee Song dovunner "Wann strahlst du?" huet sech zanterhier selbststänneg gemaach an ass e klengen Hit ginn.

Eelef Eegekompositiounen

Op "Yvon im Kreis der Liebe" sinn déi eelef Songs Eegekompositiounen an hunn en ähnlech verspillte Charakter. Wat se all verbënnt, wéi iwwregens iwwerhaapt esou zimlech déi beschten däitschsproocheg Popmusek déi leschte Joer, ass d'Verspilltheet an der Sprooch a mat de Wierder. Alles verkënnt am beschte Sënn vum Wuert zu engem Versatzstéck. An d'Zomm vun deene Stécker maachen dann nees nei Biller op. Mir ernimme just d'Nikotin-A-Turner.

Liichtegkeet ass iwwerhaapt de groussen Iwwertitel vum Disk. Oder Sprezzatura, den italienesche Begrëff vum Handwierk, scheinbar alles ouni déi klengste Méi fäerdeg ze bréngen an ëmmer locker lässeg dobäi ze wierken. Ehm, hallo. Wann ee säin Disk live agespillt huet, an et kléngt esou wéi op "Yvon im Kreis der Liebe", dann ass Sprezzatura dat d'mannst, wat ee ka soen. D'Knef mécht also hei Vakanz an Italien, an dat zanter op d'mannst de 60er - geet an d'Disko, léisst et sech un enger Schokelasfontän gutt goen, geet sech en Tattoo sichen a léisst eng schéi Chanson vum Stapel. Alles ass do, fir dat Sauwieder dobausse vergiessen ze loossen.


An der Mediathéik:

Album vun der Woch / / Tom Dockal
Lauschteren

Méi zum Thema

Richard Dawson
Eng nei Plack: 2020

De Richard Dawson ass ee Songwriter vun Newcastle Upon Tyne, aus Nordengland. Et ass eng Géigend, wou d'Leit anescht wéi zu London vill ekonomesch a gesellschaftlech Schwieregkeete matkréien.

Big Thief - Two Hands
Big Thief - Two Hands

Déi smartsten Americana Band mam zweeten Album fir dëst Joer: Den Äerd-Zwilling - e steet mat zwee Féiss um texanesche Wüstebuedem. D'Quartett iwwerzeegt schonn déi zweete Kéier dëst Joer.

Programm

  • Moies-Magazin

  • On air

    Iwwer Mëtteg

    • Aktuelles - "Eis feelt d'Jugend"

  • Resonanzen

  • Spektrum

  • Ënnerwee

Net verpassen

  • Live aus der Philharmonie

    Schubert a Rossini

    De Franz Schubert an den Gioacchino Rossini: Béid Komponisten hunn der Musekswelt Wierker hannerlooss, déi si net méi fäerdeg kruten. Dat ass de roude Fuedem vum Concert mam Philharmoneschen Orchester Lëtzebuerg en Donneschdeg, den 12. Dezember 2019, deen de radio 100,7 vun 20:00 Auer u live aus der Philharmonie iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen