Lëtzebuerg entdecken Ënnerwee am Mëllerdall

Den Nordoste vum Land bitt vill Wander- a Vëlosweeër. De Mëllerdall ass och bekannt als Petite Suisse Luxembourgeoise an op iwwer 112 Kilometer bitt de Mëllerdall-Trail Wanderweeër fir Grouss a Kleng.

Pit Walté / cbi

Mëllerdall
Foto: ORT MPSL – Th. Bichler

De Bäinumm La Petite Suisse Luxembourgeois verréit eigentlech schonn, datt de Mëllerdall predestinéiert dofir ass fir wanderen ze goen. An dat gëtt och schonn zanter 200 Jore gemaach, seet d'Marianne Origer vum ORT Mëllerdall.

Dofir ass d'Offer, déi een huet, och grouss: vill Rondweeër, mol méi laang, mol méi kuerz ronderëm déi verschidden Uertschaften. An da gëtt et nach de Mëllerdall-Trail, e Wee vun am Ganzen 112 Kilometer, deen an dräi Etappen agedeelt ass:

"Bei der Route 1 kann een zu Iechternach fortgoen, déi geet laanscht d'Ënnersauer an et kënnt een duerch den Hieberbësch zeréck. Dat sinn am Ganzen 38 Kilometer. Route 2, dat si 37 Kilometer a Route 3 kann een zu Beefort oder an der Fiels ufänken. Dat ass dee westlechen Deel an dat sinn och 37 Kilometer."

Ganz maache muss een deen Tour net, et kann ee sech op eng oder zwee Etappe beschränken. Dofir gëtt et e Pocket-Guide, deen déi jeeweileg Streck beschreift an och d'Méiglechkeete weist, wou ee schlofe kéint.

Mam Vëlo oder mat der Päerdskutsch

Wann een net esou gäre wandert, kann ee sech am Mëllerdall och mam Vëlo op de Wee maachen, et ginn Toure fir de Stroosse-Vëlo, awer och fir de Mountainbike. A wann ee Loscht huet, da kann ee sech beim ORT Mëllerdall esouguer e Guide ufroen, dee mat engem fiert.

Et ginn och speziell Visitten, seet d'Marianne Origer, déi de ganze Summer iwwer an der Rei "Discover" vu Mëtt Juli bis Enn August ugebuede ginn. Ugebuede ginn Tier mat der Päerdskutsch a kulturell Visitten, wéi zum Beispill d'Schlass aus der Fiels, eng Basilika oder den Tour "Abbey Top Secret", bei deem ee Raimlechkeete besiche kann, wou ee soss net erakënnt.

An de Mëllerdall ass net nëmmen en Naturpark, mee och e Geo-Park, an och zu deem Thema ginn et Visitten. All Samschdeg gëtt et hei eng geologesch Wanderung an den Noumerleeën, bei där de Guide ganz spezifesch op d'Geologie ageet.

Fir déi Grouss a Kleng

Net jiddwereen ass gären zu Fouss oder mam Vëlo ënnerwee, mee och da kann een de Mëllerdall mat senge schéinen Ecken entdecken. Den ORT Mëllerdall huet nämlech sechs Touren ausgeschafft, déi ee mam Auto, dem Moto oder mam Bus maache kann.

Och fir Kanner gëtt et nach eppes ganz Spezielles: den "Hits for Kids". Freides mëttes geet en Tour zu Rouspert lass, wou eng animéiert Geschicht op verschiddene Statioune virgespillt gëtt. De Guide erlieft dann zesumme mat de Kanner dës Geschicht, an zum Schluss gëtt et natierlech en Happy End.

An der Mediathéik:

Lëtzebuerg entdecken / / Pit Walté
Lauschteren

Programm

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen