Interview: D'Linguistin Caroline Döhmer iwwer "Kuriositéiten aus der Lëtzebuerger Sprooch"

Caroline Döhmer

 

 

Donneschdes um 8:50 an 12:20

Si oder hatt? Zwee oder zwou? Domat oder domadder?             
Lëtzebuergesch ass och fir Mammesproochler net ëmmer einfach. Ëmmer donneschdes analyséiert d'Linguistin Caroline Döhmer d'Kuriositéiten, déi eis am deegleche Sproochgebrauch begéine kënnen a wou een net ëmmer weess, wéi een domat soll ëmgoen.

Caroline Döhmer, Dir sidd Linguistin am Zenter fir d'Lëtzebuerger Sprooch. Wat sinn Är aktuell Projeten?


Den Ament ass d'Aktualiséierung vun der Lëtzebuerger Orthografie den Haaptprojet a mengem berufflechen Alldag. Hei geet et haaptsächlech ëm d'Formuléierung an d'Reformuléierung vum Text mat deene passende Beispiller an d'Ëmsetzung am LOD.
Meng Fuerschungsinteressie bezéie sech haaptsächlech op grammatesch Phenomeener. Am léifsten analyséieren ech Variatiounen am lëtzebuergesche Sazbau a Wuertkategorien.Do freeën ech mech schonn op 2020, well bei eis am ZLS eng modern Lëtzebuerger Grammaire soll entstoen. No der Orthografie gëtt dat also mäin nächste grousse Projet, woumat dann tatsächlech och e laangen Dram vu mir an Erfëllung geet.

An der Emissioun beschäftegt Dir Iech mat de Kuriositéiten am Lëtzebuergeschen. Wéi kënnen déi eigentlech entstoen?

All Sprooch huet am Fong hir Kuriositéiten. Beim Lëtzebuergeschen ass et just esou, datt mir et net gewinnt sinn, op eng analytesch Aart a Weis un eis Sprooch erunzegoen. Als Mammesproochler wësse mer einfach, wat "richteg" kléngt a wat net.
Wann ee sech da méi mat der Struktur vum Lëtzebuergeschen auserneesetzt, falen engem ganz vill Saachen op: besonnesch flott a vill diskutéiert sinn natierlech den "hatt" an den "si". Déi meescht "Kuriositéiten" entstinn einfach duerch Sproochwandel - d'Sprooch ass jo eppes Lieweges an do kommen dann nei Konstruktiounen eran an anerer falen eraus. Als Linguist versicht een dann erauszefannen, wat do geschitt, also wéi Konstruktiounen opgebaut sinn, a wéi se sech am Gebrauch veränneren.
 
Wéi huet sech d'Sproochfuerschung Ärer Meenung no hei am Land an de leschte Joren entwéckelt?

D'Fuerschung iwwer d'Grammaire (also mat de Kärgebidder Aussprooch, Wuertbildung, Flexioun, Sazbau) ass esou lues am Gaange sech ze etabléieren. Wat déi modern Fuerschung iwwer dës Themaen ubelaangt, si mir nach am Ufank. Et gouf virun den 2000er Jore schonn eenzel Publikatiounen, mee et war am Gesamten éischter e vernoléissegt Fuerschungsfeld. Eréischt mat der Grënnung vun der Luxemburgistik op der Uni Lëtzebuerg am Joer 2006 koumen nei Wëssenschaftler an nei Fuerschungsfroen an dëse Beräicher op. Wichteg ass hei och den Austausch tëschent de Fuerscher an d'Diskutéiere vun de Resultater, do wäert den ZLS dann och vill mat der Uni Lëtzebuerg zesummeschaffen, fir beispillsweis Informatiounen auszetauschen an Datebanken ze verbannen. Insgesamt hoffe mir natierlech och op talentéierten a motivéierten Nowuess, fir déi vill spannend Froe ronderëm d'Lëtzebuergescht kënnen unzegoen.

Lauschtert d'Episoden nach eemol hei.

Programm

  • Papperlapop - Itasca

  • On air

    The Benny Brown Show

  • Notturno

  • Notturno

  • Virum Dag

Net verpassen

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • Kuriositéiten aus der Lëtzebuerger Sprooch

    Si oder hatt? Zwee oder zwou? Domat oder domadder? Lëtzebuergesch ass och fir Mammesproochler net ëmmer einfach. Mir ginn der Saach op de Fong.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen