Musikalesch Visittekaart

Portraite vun Invitéë mat Hellëf vun der Musek, déi si lauschteren.

John Rech

13. Nov 2016 - 11:04

Als aktive Museker ë.a. vun T42 an haut Dream Catcher steet den John Rech zanter den Ufanks Nonzeger op der Bühn. Op senger Aarbecht ass hie fir d'Programmatioun vu Concerten am grousse Beräich Rock/Pop a senger Heemechtsstad zoustänneg. Musek ass deemno e groussen Deel vu sengem Liewen. "Et ass eng Passioun", résuméiert hien, "et ass d'Kombinatioun vun Aarbecht a Pleséier!". De musekbegeeschterten Diddelenger ass Invité beim Fred Medernach an huet de musikalesche Programm fir dës Stonn zesummegestallt.

Op senger Playlëscht stinn ë.a. U2 (Where The Streets Have No Name), Ryan Adams (To Be Young),  Ezio (Sweet Thing/Tuesday Night) , Beoga (Aurora), Frank Turner (Photosynthesis) an ... Dream Catcher (Je Veux Du Soleil Plein La Vie).

"Hei zu Lëtzebuerg hu mir als Museker heiansdo eng gewësse Schimmt, fir eis eege Saachen an d'Fënster ze stellen", seet hien, "besonnesch wa mir eis Resultater a Leeschtungen zum Beispill mat deene vun eise Sportler vergläichen. Dozou gëtt et kee Grond!"

Säin Job als Kulturmann op der Diddelenger Gemeng ass fir den John Rech Chance an Défi: "Déi kommerziell Säll brénge grouss Nimm, déi etabléiert an einfach ze fanne sinn. Du brauchs dofir just en éierbare Budget. Eis Aufgab ass anescht". Hien ass stänneg op der Sich no neien Talenter an Decouverten - an et gëtt him de Kick, wann hie Läit wéi de Frank Turner oder de Joris konnt engagéieren ... ier se ganz grouss erauskoumen.

Dream Catcher bezeechent hien als "vun Ufank u mäi Projet, deen ech mat Musekerkolleegen duerchzéien". Hie wier kloer de Chef am Ring, annescht wéi bei T42, "eng Schülerband, wou jidderee matschwätze konnt". Hie laacht, wann hie sengem Matmuseker Eric Falchero säi Kommentar iwwert Dream Catcher zitéiert: "Dës Band ass eng demokratesch Diktatur!". Vun Dream Catcher koum elo den neien Album "Vagabonds" eraus, deen déi nächst Woch zu ... Dubai opgefouert gëtt. "Mir sinn iwwert d'Alliance Française an d'Renne komm, fir eis Kandidatur anzereechen a während zwee Deeg an de Vereenegten Arabeschen Emiraten ze spillen. Dat hunn nach aner Bands gemaach, mir sinn ausgewielt ginn - a sinn houfreg drop", esou de Museker.

Musek ass wéi gesot Passioun fir den John Rech, si fuerdert awer och déi eng oder aner Concessioun. "Ech sinn reegelméisseg op Tour, neierdéngs och ëmmer méi dacks am Ausland. Do muss d'Famill matspillen, et gesäit een d'Kollege manner an och de Sport kënnt ze kuerz" stellt hie fest - dat als grousse Fan vum Diddelenger Basket- a Futtball.

 

 

 

Lauschteren

Rezent Emissiounen

• De Rosch Mirkes

  18. Nov 2018 - 14:00

  Dem pensionéierte Museksenseignant an Acteur an der Lëtzebuerger Musekszeen säi musikalesche Goût ass ganz villfälteg.

• De Pol Belardi

  21. Okt 2018 - 14:00

  Dem Jazziste Pol Belardi säi musikalesche Goût hält net beim Jazz op.

• D'Geiistin Sandrine Cantoreggi

  24. Jun 2018 - 10:04

  Vill Klassik an e bëssen Jazz

• Den David Ianni

  29. Abr 2018 - 10:04

  De Pianist a Komponist presentéiert säi perséinleche musikalesche Choix.

• De Paul Thiltges

  15. Abr 2018 - 10:04

  Et muss een net onbedéngt virun der Kamera stoen, fir an der Filmzeen aktiv an erfollegräich ze sinn: eisen Invité ass e Beispill heifir.

• De Kid Colling

  11. Mäe 2018 - 10:04

  De Lëtzebuerger Blues- an Jazzgittarist iwwerhëlt d'musikalesch Programmatioun vun dëser Stonn - déi éischter gemittlech ausfält.

• Den Damien Sagrillo

  11. Feb 2018 - 10:04

  De Musekswëssenschaftler presentéiert säi musikalesche Choix.

• D'Sopranistin Mariette Lentz

  28. Jan 2018 - 10:04

  Klassik, Jazz a Rock: de musekalesche Goût vun der Mariette Lentz 

• De Guy Frisch

  14. Jan 2018 - 10:04

  De Perkussionist an Direkter vu Lucilin presentéiert säi musikalesche Choix.

• Fernand Weides

  31. Dez 2017 - 10:04

  De Journalist a fréieren Direkter vum radio 100,7 (Juli 1994-August 2013), huet de musikalesche Programm fir dës Stonn zesummegestallt.

• De Jeff Mack

  10. Dez 2017 - 10:04

  De Countertenor, Trompettist an Dirigent presentéiert Musek, déi Statiounen a sengem Liewe markéiert huet.

• D'Lydia Rilling

  12. Nov 2017 - 10:04

  D'Dramaturgin an der Philharmonie a Responsabel fir de Festival Rainy Days presentéiert hire musikalesch Choix.

• De Marc Jacoby

  22. Okt 2017 - 10:04

  Den Direkter vum Conservatoire du Nord presentéiert seng musikalesch Favoritten.

• D'Cathy Krier

  15. Okt 2017 - 10:04

  Der Pianistin hir musikalesch Virléiften gëllen der Klassik.

• Monique Melsen

  24. Sep 2017 - 10:04

  Scho mat 20 Joer stoung déi gebierteg Ettelbréckerin beim Grand Prix Eurovision de la Chanson zu Dublin op der Bühn.