Gemengen 90 Millioune méi fir d'Gemengen
Den Inneminister proposéiert finanziell Ënnerstëtzungen an Entlaaschtunge fir d'Gemengen. De Syvicol begréisst d'Propos. Déi zousätzlech Gelder sollen och d'Reform vun de Gemengefinanzen erméiglechen.
Carole Schimmer
D’Gemenge solle vum nächste Joer u ronn 90 Milliounen Euro méi kréien ewéi bis elo. Den Inneminister Dan Kersch huet dem Syvicol um Dënschdegmoie konkret Proposen op den Dësch geluecht.
An Zukunft géif de Staat d’Paie vun den Enseignanten aus der Grondschoul ganz iwwerhuelen. D’Gemengen hu bis elo een Drëttel vun deene Paie bezuelt. Zejoert woren dat 146 Milliounen. Op där anerer Säit géifen d’Gemengen d’Cotisatioune fir d’Pensioune vun hire Beamten integral bezuelen. De Staat huet d’läscht Joer 48 Millioune bäigeluecht. Déi Reform géing 2017 ëmgesat ginn.
Reform vun de Gemengefinanzen
De Syvicol-President Emile Eicher fënnt déi Propos ganz interessant. Duerch déi zousätzlech Gelder kéint een d’Reform vun de Gemengefinanzen ëmsetzen.
Déi Reform gesäit fir, datt d’Ëmverdeelung vun deene staatleche Gelder an Zukunft der Roll vun der Gemeng entsprécht. Den Dan Kersch huet och Kritäre proposéiert fir déi Ëmverdeelung festzeleeën: Nieft der Landesplanung, der Unzuel un Aarbechtsplazen an Awunner gëllen och sozioeconomesch Kritären grad ewéi d’Efforte vun de Gemengen am Beräich vum soziale Wunnengsbau.
