Um Treffe vun den EU-Staats- a Regierungscheffe war et kloer: Si géifen mat engem Accord ausernee goen. Dowéinst ward’Treffen nach verlängert ginn.
De britesche Premier David Cameron war ganz zefridden iwwert de Kompromëss: "Menger Meenung no ass dat hei genuch, fir datt ech ka recommandéieren, datt Groussbritannien an der Europäescher Unioun bleift."
Sträitpunkt Sozialleeschtungen
Een ëmstriddenen Dossier betrëfft d’Sozialleeschtunge fir Migranten, déi a Groussbritannie schaffen. Am Accord vu Bréissel ass eng Zort Noutbrems virgesinn, fir de Fall wou vill EU-Bierger beieneen a Groussbritannien ukommen.
Sozialleeschtungen, wéi Sozialwunnengen a Loun-Subventioune kënne véier laang Joer reduzéiert oder gestrach ginn. Dës Reegelung däerf nëmme bannent siwe Joer applizéiert ginn. Den David Cameron hat 13 Joer gefuerdert. A fir Migranten, déi schonn an Groussbritannie schaffen, gëllt dee Prinzip eréicht vun 2020 un.
Kee Vetorecht bei Gouvernance economique
En anere Punkt am Accord concernéiert d’Eurozon an d’Gouvernance economique. Do krut den David Cameron net d'Vetorecht, wat hie gefuerdert hat. Den Europaparlamentspresident Martin Schultz ënnersträicht, datt een net op ee kohärenten, europäesche Bannemaart kéint insistéieren, a gläichzäiteg bei der Iwwerwaachung vun de Banke verschidde Systemer hunn.
Och fir Lëtzebuerg wär de Punkt vun der Gouvernance economique extrem wichteg. D'Conditioune misste fir jiddereen déi selwecht sinn, esou de Premier Xavier Bettel.
Oppositioun an eegene Reien
Den David Cameron huet zu Bréissel een Accord kritt. Elo geet et a Groussbritannien ëm d'Fro: Stay in or leave...? An der EU bleiwen oder austrieden?
Den David Cameron huet a senger Heemecht d'Charge z'iwwerzeegen. Do kritt hie Géigewand aus den eegenen Reien. De Buergermeeschter vun London, de Boris Johnson, huet sech laang net geäussert iwwert seng Positioun zum Brexit. Schlussendlech huet hien e Sonndeg den Owend annoncéiert, datt hie fir ee Brexit wëllt plädéieren. De Boris Johnson ass bei de Brite ganz beléift. Seng Positioun wärt een determinanten Afloss op déi ganz Campagne hunn. Fënnef Regierungsmember hu sech fir de Brexit ausgeschwat, dorënner de Justizminister Michael Glove, een enke Frënd vum David Cameron.
Och bannent der Labourpartei, ginn et divergent Positiounen. Ee Grupp "Vote leave" gouf forméiert, zesummen mam Millionnaire John Mills. Hien ass ee vun de gréisste Geldgeber vun der Labourpartei.
Fir de Brexit ass och déi euroskeptesch a rietspopulistesch UKIP-Partei, déi bei de leschten Europa-Wahle 27 Prozent vun de Stëmme krut.
Dat britescht Parlament kennt um Méindeg zesumme fir iwwert den Accord an de Referendum ze diskutéierten. Den 23. Juni stëmmen d’Briten doriwwer of, ob si wëllen an der EU bleiwen.