Ëmwelt an Transport Ze héich Emissiounen, autoriséiert vun der SNCH?

Net just VW, mee och eng 30 Diesel-Autoe vun anere Marquen hunn ze héich Ofgaswäerter, heescht et an engem Bericht vun der Bréissler ONG "Transport and Environment”. Zwee vun deenen Autostypen, ee Ford an ee Porsche, kruten hir Autorisatioun vun der Lëtzebuerger Zouloossungsautoritéit SNCH.

Danièle Weber / po

Auspuffen

Bei den zwee Autotypen, déi zu Lëtzebuerg zougelooss goufen, handelt et sech ëm de Ford C-Max II an de Porsche Makan. Dem ONG-Rapport no géif de Ford bis zu sechs Mol méi Stéckoxiden aus dem Auspuff blosen, wéi ënnert der "Euro 6"-Norm erlaabt sinn. Beim Modell vu Porsche wieren et bal zéng Mol méi.

D'Lëscht vun den 30 Autoen, déi am knaschtegste solle sinn, gouf opgestallt op der Basis vu Resultater aus Investigatiounen, déi vun nationalen Autoritéiten a Frankräich, Däitschland a Groussbritannien duerchgefouert goufen, nodeems dës duerch de VW-Skandal waakreg gi waren.

VW-Skandal: Just d'Spëtzt vum Äisbierg

Déi meescht vun den Autostypen op der Lëscht goufen a Groussbritannien, Frankräich oder Däitschland zougelooss. Nieft Ford a Porsche sinn d’Marquen Renault, Mercedes, Opel, BMW oder Skoda vertrueden. Bei verschiddene Modeller géife bis zu 14 Mol sou vill Stéckoxiden an d’Loft geblose ginn, wéi erlaabt. Déi iwwer aacht Millioune Volksween, déi vum Dieselgate betraff waren, sinn nëmmen d'Spëtzt vum Äisbierg, schreift d’ONG.

D'Autoe wiere vun den nationalen Autoritéiten zougelooss ginn, ouni datt probéiert gi wier erauszefannen, firwat se sou héich Emissiounswäerter hunn an ob illegal Ofschalt-Dispositifen agesat goufen. Ass een Autostyp vun enger nationaler Kontrollstatioun, wéi der Lëtzebuerger "Société nationale de certification et d’homologatio​n" (SNCH), zougelooss, da gëlt dat fir déi ganz EU. A just déi Statioun, déi den Typ zougelooss huet, kann dat och revidéieren.

SNCH, spezialiséiert op Emissiounssystemer?

Eventuell Miessunge vun nationalen Autoritéite sinn awer net ëffentlech, an eng SNCH ass och net forcéiert, déi Donneeën erauszeginn.

Der ONG no behaapten Insider, datt grad d'Emissiounssystemer heefeg iwwer Lëtzebuerg zougelooss géife ginn. Dat bleift awer eng Behaaptung, well just déi endgülteg Autorisatioun als Ganzt ass public, et gesäit een doranner net, wou déi eenzel Deeler iwwerpréift goufen.

D’EU-Transportministere kommen de 7. Juni zu Lëtzebuerg zesummen, ënner anerem fir iwwert déi Problemer vun den Emissiounstester ze diskutéieren. Ënnert anerem geet et dann ëm déi grouss Ecarten tëscht de Resultater vun den Tester an deem, wat effektiv an der Loft gemooss gëtt.

Méi zum Thema

Michel Cames
Ëmwelt

Den Niveau vum kriibsereegende Stéckstoff an der Loft ass permanent ze héich. Dem Michel Cames no, ass déi läscht 20 Joeren an der EU just op Diesel gesat ginn.

FORSSA, FINLAND - MAY 17, 2014: Sign Volkswagen against blue sky. The Volkswagen Group delivered over 9 million vehicles in period from January to November for the first time ever in 2014.
VW-Skandal

"D’SNCH huet fir Volkswagen selwer keng Genehmegungen erausgi wat d’Emissiounen ubelaangt", esou den Direkter vun der SNCH, de Claude Liesch.

Net verpassen

  • BEAUTIFUL DECAY Festival

    Beautiful Decay Festival.jpg

    Vum 28.-29. Mee ass den BEAUTIFUL DECAY Festival am Gréiweschlass zu Käerch. De radio 100,7 ass e Samschdeg den 28.05. live sur place.

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen