Brexit Echec vun der "Generatioun Juncker"

Déi jonk Wieler hu sech beim EU-Referendum a Groussbritannien manner bedeelegt ewéi déi al. Mee déi, déi sech ausgedréckt hunn, hu sech kloer fir eng weider EU-Memberschaft ausgeschwat: 75 Prozent vun de Wieler tëscht 18 a 24 Joer hu géint ee Brexit gestëmmt. Et wier am Interessi vun där Generatioun, wann den europäeschen Integratiounsprojet géif viru gedriwwe ginn amplaz den nationalen Egoismen weider nozeginn.

Pia Oppel

Kommentar Pia Oppel

Natierlech kann een den Ausgank vum Referendum net reng generationell erklären. Och sozial Facteuren hunn eng staark Roll gespillt. A sécher och Suergen, déi mat der Referendumsfro selwer net onbedéngt eppes ze dinn haten. Mee d'Statistike sinn op engem Punkt eendeiteg: Wat méi al, wat méi Leit fir de Brexit gestëmmt hunn.

Ganz besonnesch ee Politiker misst sech dowéinst a Fro stellen: Den EU-Kommissiounspresident Jean-Claude Juncker, deen der jonker Generatioun ëmmer nees virgeheit huet, si géif de Wäert vum europäesche Friddensprojet net erkennen.

Trotz héijem Jugendchômage an der EU sinn et grad déi Jonk, déi un dëse Projet gleewen. Ee Projet, dee vun hiren Elteren a Grousselteren a Fro gestallt gëtt.

EU ass méi wéi ee Friddensprojet

De Problem ass also éischter deen heiten: Dem Jean-Claude Juncker seng Generatioun versteet net, dass eng reng geopolitesch a wirtschaftlech Visioun vun der EU un hiren eegene Widderspréch scheitert. D'EU vun de Mueschtbalancen tëscht Memberstaaten a vun de Kompromësser tëscht Staats- a Regierungschefen, hält d'Politik an enger Logik vu Konkurrenz, Dumping an nationalen Egoismen gefaangen. Dohier kënnt den Däiwelskrees vu Frust, Angscht a Populismus, deem déi jonk Brite sech entgéint gestallt hunn.

An Zäiten wou d'Inegalitéiten tëscht Aarm a Räich an Europa wuessen a wou weltwäit autoritär Regimer nees am Komme sinn ass d'EU fir meng Generatioun d'Verspriechen, dass sozial Gerechtegkeet an Demokratie och am 21. Joerhonnert, déi eenzeg richteg Äntwert bleiwen. Mee soulaang d'Europaparlament net an deene wierklech wichtege Beräicher wéi der Sozial- a Steierpolitik kann matdecidéieren, kann dat Verspriechen net ageléist ginn.

"Méi Europa": Eng Utopie?

D'Fuerderung no enger méi staarker europäescher Integratioun kléngt haut méi utopesch wéi jee. An och dofir dréit dem Jean-Claude Juncker seng Generatioun sécher een Deel vun der Responsabilitéit. Si huet d'Chance verpasst, déi néideg Integratiounsschrëtter anzeleeden, wéi dee politeschen a wirtschaftleche Kontext eng gesellschaftlech Debatt doriwwer nach erlaabt hätt.

Den hallefhäerzegen europäesche Verfassungsprojet vun 2004, dee grad vun deene Jonken a ville Länner ofgelehnt gouf, war an deem Sënn een éischte Schrëtt a Richtung vun der europäescher Desintegratioun, déi elo am Gaangen ass.

De Jean-Claude Juncker huet 2014 bei sengem Amstruntrëtt versprach, dass d'EU sech op dat Wesentlecht wéilt konzentréieren, hien huet domadder versicht den Europaskeptiker entgéint ze kommen. Mee der Juncker-Kommissioun hir minimalistesch Approche ass net d'Léisung, si ass Deel vum Problem.


Kommentar vum Pia Oppel

Méi zum Thema

Jean Asselborn
Jean Asselborn

"D'EU ass net k.o., mee muss grad elo zesumme stoen!" Dat seet de Jean Asselborn, Ausseminister vun engem EU-Grënnungsstaat. Hie fuerdert, dass London d'Prozedur fir e Brexit séier declenchéiert!

RER Brexit.JPG
RIICHT ERAUS

Lëtzebuerg kéint vum Brexit profitéieren - dat gouf an der Emissioun "Riicht eraus" däitlech. D'Onsécherheeten, déi mam Austrëtt zesummenhänken, kéinten awer negativ fir d'Staatsfinanze sinn.

london brexit.jpg
Referendum a Groussbritannien

Nodeems kloer ass, datt d'Brite fir ee Brexit gestëmmt hunn, huet de Premier David Cameron um Freideg annoncéiert, datt hie fir Oktober wëll zrécktrieden. D'EU kuckt elo op d'Austrëttsverhandlungen.

london oxford street.jpg
Brexit

An der britescher Haaptstad London wollten iwwer 60% vun de Wieler an der EU bleiwen. Ëmsou méi grouss war de Schock um Freideg de Moien, wéi d’Londoner mat der Nouvelle vum Brexit erwächt sinn.

Programm

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • CinÉast 2019

    Et ass déi zwieleften Editioun vum CinÉast Filmfestival. Vum 3. bis den 20. Oktober ginn iwwer 65 Featuren a 50 Kuerzfilmer aus 20 Länner aus Mëttel- an Osteuropa gewisen.

Net verpassen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen