Brexit "D'Autoritéit vum EU-Recht geet op en Enn"

D'Austrëttsprozedur vu Groussbritannien aus der EU soll Enn Mäerz 2016 ageleet ginn. Dat sot d'Premierministesch Theresa May beim Parteidag vun der Conservative Party. Et annoncéiere sech haart Brexit-Verhandlungen.

Carole Schimmer / cwi

Theresa May 3
Theresa May. Foto: Picture alliance / Annegret Hilse / Svem Simon

D’Prozedur fir aus der Europäescher Unioun auszetrieden ass am Artikel 50 vum Lissabonner Vertrag festgeluecht. Deen Artikel gesäit vir, datt Groussbritannien dem EU-Rot eng Notifikatioun muss areechen, fir matzedeelen, datt d’Land wëllt aus der EU austrieden. Duerno kënnen d’Verhandlungen iwwert een Austrëtts-Accord ufänken. E Sonndeg, 2. Oktober huet d'Premierministesch Theresa May annoncéiert, datt dëst virun Enn Mäerz 2017 soll geschéien.

Well virun allem d’Schotten an d’Nordire majoritär géint ee Brexit gestëmmt haten, huet déi konservativ Premierministesch drun erënnert, datt de Referendum fir ganz Groussbritannien gëllt. Déi concernéiert Verwaltungen a Schottland, Wales an Nordirland solle consultéiert ginn - genee esou wéi déi lokal Autoritéiten a Vertrieder aus der Wirtschaft. "Mee den Job fir iwwer nei Relatioune mat der EU ze verhandelen, ass den Job vun der Regierung." Et géif keen Opt-out gi fir de Brexit, huet d’Theresa May däitlech gesot. Si géif och net zouloossen, datt Nationalisten d'Land géife splécken.

Zougank zum Bannemaart

D'Theresa May huet an hirer Ried um Parteidag vun der Conservative Party betount, datt Groussbritannien och nom Austrëtt aus der EU wéilt mat Europa zesummeschaffen. "Mee mir wëlle selwer decidéieren, wéi mir d'Immigratioun kontrolléieren a mir wëllen iwwer eis eege Gesetzer bestëmmen." Groussbritannien géif probéieren, dee beschten Deal mat der EU auszehandelen, esou déi konservativ Ministesch.

Si wënscht sech eng Zesummenaarbecht am Kampf géint den Terrorismus an ee fräien Handel fir Gidder a Servicer. D'Betriber solle kënnen um EU-Bannemaart deelhuelen an d'EU-Betriber um britesche Bannemaart. "Ech hätt gär, datt den Deal räif Relatiounen erëmspigelt, esou wéi déi vun enke Frënn."

Dat eent net ouni dat anert

D’Halschent vun den Echangen, déi britesch Betriber am Ausland hunn, geschéie bannent der EU. Aus deem Grond ass d'Fro vum Zougank zum Bannemaart fir Groussbritannien kruzial. Ka Groussbritannien een Zougank zum EU-Bannemaart kréien an déi fräi Zirkulatioun vun EU-Bierger limitéieren?

Neen, seet de Jean-Claude Piris, fréiere Generaldirekter vum juristesche Service vum EU-Rot. D'Immigratioun vun EU-Bierger wier eng vun de véier Fräiheete vum Bannemaart. "Da kënne si also net um Bannemaart deelhuelen." Wa Groussbritannien wéilt Handelsaccorde mat Drëttlänner aushandelen, kéint de Staat sech net méi op d'Europäesch Zollunioun oder eng gemeinsam Handelspolitik mat der EU baséieren.

Länner, wéi Norwegen zum Beispill, hätten een Accès op de Bannemaart. Mee si missten och d'Standarden an d'Prinzipie vum Bannemaart respektéieren, betount de Jean-Claude Piris. "Wann d'Briten dat och wëllen, musse si all d'Spillregele respektéieren."

Gesetzesännerungen

D'Theresa May huet an hirer Ried annoncéiert, dat e "Great Repeal Bill", iwwersat een Ophiewungsgesetz, soll ausgeschafft ginn. Domat soll d'Gesetz vun 1972 opgehuewe ginn, an deem de Bäitrëtt vu Groussbritannien an d'EU festgehale war. An deem Gesetz stoung, datt d'EU-Recht a Groussbritannien géif applizéiert ginn.

D'EU-Gesetzer sollen elo an d'britescht Recht iwwerdroe ginn. Wann de Brexit bis a Kraaft trëtt, kéinten dës Gesetzer da geännert oder ofgeschaaft ginn. "Den Effet wäert kloer sinn: Eis Gesetzer ginn net méi zu Bréissel gemaach, mee zu Westminster. D'Autoritéite sëtzen dann net méi zu Lëtzebuerg, mee a Geriichter hei am Land."

Am Detail soll de "Great Repeal Bill" am Mee d'nächst Joer an der Ried vun der Queen presentéiert ginn.

Brexit muss verhandelt ginn

Den Austrëtt vu Groussbritannien gëtt mat der EU negociéiert, wann d'Notifikatioun iwwer de Brexit un den EU-Rot adresséiert gouf. Laut dem Lissabonner Traité kënnen dës Verhandlunge bis zu zwee Joer daueren. Deen Delai kann awer verlängert ginn.

Während deenen zwee Joer bleift Groussbritannien Member vun der Europäescher Unioun a muss seng Engagementer anhalen. Donieft behalen d'Briten hiert Stëmmrecht. An den Debatte vum EU-Rot an de Minister-Conseile misst Groussbritannien sech awer zréckzéien, wann et em de Brexit geet, ënnersträicht de Jean-Claude Piris. Wann Dossieren, wéi d'Fräihandelsaccorde wéi TTIP oder CETA, oder Gesetzer géife verhandelt ginn, dierften d'Briten awer derbäi sinn.

De Jean-Claude Piris erkläert, et géifen zwou Phasen an de Brexit-Verhandlunge ginn. Déi Éischt betrëfft de reelle Scheedungsaccord. Iwwer déi bilateral Relatioune kéint dann nom Austrëtt verhandelt ginn. Iwwerdeems dierft Groussbritannien, esou laang et EU-Memberstaat wier, keng bilateral Accorde mat Drëttlänner ofschléissen. Dat wier eng Missioun vun der EU-Kommissioun.

An der Mediathéik:

Dossier vum Dag / / Carole Schimmer
Lauschteren

Méi zum Thema

Pro-EU Manifestatioun London 3
Brexit

A Groussbritannien waren uechter d'Land Demonstratioune géint de Brexit. Zu London sinn e puer Dausend Leit bei d'Parlament marschéiert fir géint d'Resultat vum Referendum ze protestéieren.

Roland Junck, British Steel
Brexit

All Woch diskutéiert d'britesch Regierung mat grousse Betriber, sou de Roland Junck. Groussbritannien waart net op en Accord mat der EU, fir de Brexit virzebereeden, seet den neie Chef vu British Steel.

Robert Scharfe
Bourse

En Austrëtt vu Groussbritannien aus der EU ass keng gutt Nouvelle, mengt de Robert Scharfe, Generaldirekter vun der Bourse. Wie géif hoffe vum Brexit ze profitéieren, géif extrem kuerzfristeg iwwerleeën.

Logement-Brexit.JPG
Immobilien

De Brexit kéint Auswierkungen op den Immobiliemarché hei am Land hunn. Am Logementsministère, bei den Agencen an och der Chambre immobilière ass dat een Thema. An trotz Onkloerheet, ginn et Zeenarien.

Programm

Net verpassen

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen