Xavier Bettel D'Relance vun der europäescher Iddi
D'Relance vun der europäescher Iddi: dat ass graff resüméiert den Inhalt vun den aktuellen Diskussiounen op europäeschem Niveau. Am Mëttelpunkt: d'Sécherheet, d'Investissementer an d'Jugend. No enger Entrevue zu Paräis hunn de franséische Staatspresident François Hollande an de Lëtzebuerger Staatsminister Xavier Bettel och nach emol e klore Kalenner verlaangt, fir d'Lancement vun de Verhandlungen iwwert de Brexit.
D'aktuell Ongewëssheet, déi duerch de Brexit-Referendum vum 23. Juni entstan ass, géing virun allem Groussbritannien selwer schueden, mee och der EU, huet de Xavier Bettel widderholl. Et wier dem Premier no och net an der Rei, wa London sech fir d'Zukunft dat erauspickt wat ëm gefält. "Virdru waren se bannent der EU a wollte lauter opt-outs. Elo si se dobaussen a wëlle lauter opt-ins", esou de Xavier Bettel. Groussbritannie wéilt nëmme vun de Virdeeler vun der EU profitéieren.
"An den Ënnerscheeder staark sinn"
D'Relance vun der europäescher Iddi, déi stäipt sech op d'Verdéiwung vun der Unioun op dräi Haaptachsen: d'Amplifikatioun vun den d'Investissementer a vum Juncker-Plang, d'Jugend an d'Mobilitéit an, wéi et schéngt virun allem, d'gemeinsam Sécherheets- a Verdeedegungspolitik.
Mengt de Premier dann, datt d'EU-Memberstaaten sech mat hire grousse Meenungsverschiddenheete bei kriddelege Froe kennen Eens ginn? "Dass mer eis Eens sinn, ech wëll keng Kultur vun 28, déi di selwescht ass", äntwert de Xavier Bettel. D'Stäerkt vun Europa léich och an den Ënnerscheeder, "Mir hu gemeinsam Feinden an déi musse mir och gemeinsam bekämpfen." Och d'Baussegrenze misste gemeinsam Regelen hunn.
Zu Bratislava de 16. September, a virdrun an duerno, gëtt preparéiert wéi d'EU d'nächst Joer soll fonctionnéieren. Et wier elo nach ze fréi fir iwwert Traités-Ännerungen ze schwätzen. "Mir musse kucken, ob dat wat mir hu fonctionnéiert oder net", seet de Xavier Bettel. Verschidde Saache géingen awer den Ament net fonctionnéieren. "Et gëtt Eurolänner, et gëtt Net-Eurolänner, et gëtt Schengen-Länner, et gëtt Net-Schengen-Länner." Et ass wichteg do ze verdéiwen, wou et gemeinsam besser géing goen.
Fir d'Bierger do sinn
Dem Xavier Bettel no, wier d'EU awer net just Finanz, mee och Soziales a Valeuren. "D'EU, dat ass net nëmme Sue maachen." D'EU wier fir d'Bierger do, net nëmme fir d'Betriber an d'Geschäfter. "Et ass d'Libertéit. Och d'Fräiheet déi ophält, do wou deem Aneren seng ufänkt"
Um 70. Anniversaire vum Traité vu Roum d'nächst Joer, wier et wichteg, datt d'europäesch Unioun gutt fonctionnéiert. Dofir misst een nei Methoden an d'Ae faassen, och wann dës dem Premier no zu dësem Zäitpunkt nach Hypothees sinn. "Dofir hunn ech nach déi Echangë mat enger Rei Kollegen déi nächst Deeg", sou de Xavier Bettel.
Méi zum Thema
Dossier
"Brexit"
Artikele ronderëm den Austrëtt vu Groussbritannien aus der EU.
Käreuropa a Klengbritannien
D'Viviane Reding an de Claude Turmes begréissen d'Iddi vun engem Käreuropa ronderëm d'Grënnungsmemberen. Sécherheet, Wirtschaft a Soziales missten am Mëttelpunkt vum europäesche Projet stoen.
Brexit: d'Konsequenze fir Lëtzebuerg
Lëtzebuerg kéint vum Brexit profitéieren - dat gouf an der Emissioun "Riicht eraus" däitlech. D'Onsécherheeten, déi mam Austrëtt zesummenhänken, kéinten awer negativ fir d'Staatsfinanze sinn.
D'Recht op Sécherheet an Europa
No den Attentater zu Bréissel plaidéiert de Kommissiounspresident fir eng "Unioun vun der Sécherheet". Mat Aktionismus hätt dat näischt ze dinn. De Jean-Claude Juncker hofft op méi Solidaritéit bannent der EU.
