Landwirtschaft “Ech wëll bei de Pestizide voll Transparenz schafen”

Greenpeace wëll wëssen, wéi eng Zorte Pestiziden a wéi enge Quantitéiten agesat ginn. Bei den Insektizide wieren d’Donnéeë geheim, wann néideg wéilt ee se viru Geriicht akloen, seet d’Ëmwelt-ONG. Et hätt een näischt ze verstoppen, sou de Landwirtschaftsminister Fernand Etgen am Interview mam Mick Entringer. “Ech wëll an deem Beräich voll Transparenz schafen”. Den nationalen Aktiounsplang Pestiziden soll de präzise Suivi erméiglechen, heescht et.

Op d’Kritik, den zweeten Entworf vun deem Plang géif keen Zäitplang a keng konkret Ziler festleeën, äntwert den DP-Politiker: “et ass méi wichteg, konkret Aktiounen um Terrain ze maache wéi mat Zuelen ze jongléieren”.

EU-Hëllef fir d’Mëllechbauere “geet sécherlech net duer”

Den Hëllefspak fir de Mëllechsecteur, op dee sech d’EU-Agrarministeren ugangs der Woch eens gi sinn, wier ee “wichtegt Signal, datt d’Politik bereet ass, d’Landwirtschaft z’ënnerstëtzen”, sou de Fernand Etgen. Wéinst dem Präisverfall vun der Mëllech gouf een zweete Pak vu 500 Milliounen Euro bannent manner wéi engem Joer decidéiert.

Lëtzebuerg kritt eng 560.000 Euro zougesprach. D’Regierung däerf nach eng Kéier sou vill u Subventiounen un de Secteur verdeelen, deen hei am Land eng 1.000 Betriber betrëfft. “Et geet sécherlech net duer, fir d’Problemer vun de Betriber ze léisen”, gëtt de Minister zou. D’Mëllechbauere sollen encouragéiert ginn, manner ze produzéieren. Domat soll nees d’Gläichgewiicht tëschent Offer an Demande hiergestallt an d’Präisser stabiliséiert ginn.

“Zukunftspak” hätt ënnert anerem Hëllef fir d’Baueren erlaabt

Ass dës Hëllef ee Bonbon fir Wieler? De Fernand Etgen géif dat net esou gesinn: “hei geet et am Fong geholl drëm, fir e Secteur z’ënnerstëtzen, dee wierklech an enger schlëmmer Kris ass”.

Déi rezent Ausso vum Wirtschaftsminister Etienne Schneider, de Spuer- a Steierpak vun der Regierung wier ee “Feeler” gewiescht, misst een nuancéieren. Den “Zukunftspak” hätt et ëmmerhin erlaabt, d’Staatsfinanzen ze sanéieren. “An do kann ech nëmme soen: ‘mission accomplie’”, sou de Fernand Etgen.

Ouni de Spuer- a Steierpak wieren eng Rei Politiken elo net méiglech gewiescht. De Landwirtschaftsminister huet d’Steierreform, de "congé parental" an och d’Finanzhëllefe fir de Mëllechsecteur genannt.

D’Acteuren aus der Landwirtschaft waren an de leschte Méint zweemol am Kader vun den “assises agricoles” zesummen. Zu engem Moment also, wou d’Naturschutzgesetz ausgeschafft ginn ass, ënnersträicht de Minister. “Ech mengen, mir hunn et fäerdeg bruecht, fir dem landwirtschaftleche Secteur bei enger ganzer Rei nach oppene Froen eng Äntwert ze ginn”.