De Brexit ass aus der Siicht vun der britescher Industrie kuerzfristeg positiv, well d'Pond gefall ass an d'Indsutrie d'Chance kritt, méi kompetitiv ze ginn. Allgemeng schued de Brexit awer mat der Ongewëssheet der britescher Ekonomie.
Am britesche Konstruktiounssecteur gesäit ee schonn éischt Schwächten, esou de Roland Junck. De fréiere Chef vun Arcelor Mittal seet awer och, datt Groussbritannien net géing waarden, bis en Accord mat der EU steet.
D'britesch Regierung hätt all Woch Diskussioune mat Betriber, dorënner British Steel. Donieft géing de Minister fir d'Ré-Industrialiséierung (northern powerhouse) an de Commonwealth, wéi Beispillsweis a Kanada an an Indien reesen, fir nei Relatiounen ze verhandelen.
Wire Solutions, Biissen
Allgemeng wier et wichteg ze kucken, ob eng Aktivitéit bei den Aktionär passt, sou de Roland Junck op d'Fro, ob Greybull Capital (d'Mammenhaus vu British Steel) a Fro kéim, fir Wire Solutions zu Biissen vun Arcelor-Mittal z'iwwerhuelen. Fir British Steel kéint dat virun allem de Fall si fir Rodange. Awer och fir Biissen, sou den neie Chef vu British Steel.
Dem Roland Junck no wier et un Arcelor-Mittal eng Demarche ze maachen. Hien huet betount, datt seng Ausso um radio 100,7 keng ëffentlech Offer ass.
De Standuert Lëtzebuerg
D'Aktivitéiten am Lëtzebuerger Stolsecteur kënnen dem Roland Junck no mat deenen néidegen Investissementer erhale ginn. Et géing et manner ëm d'Quantitéit goen, mee méi ëm d'Spezialiséierung vun de Produiten. Et wier méi interessant, Produiten ze produzéieren, déi gefrot sinn, wéi 10 Milliounen Tonne Stol, déi kee wëll.