Kino Kann de Grupp Kinepolis de Ciné Belval halen?
De Konkurrenzrot decidéiert onsen Informatiounen no an den nächste Wochen, ob Utopia S.a. beim Kaf vum Ciné Belval a seng siwe Säll vun enger dominanter Positioun profitéiert huet oder net. Am schlëmmste Fall, misst Kinepolis de Ciné Belval rëm verkafen.
An engem Tëscherapport vu November d'läescht Joer, kënt de Conseil de la concurrence zur Konklusioun, datt wéi Utopia S.a. 2013 Ciné Belval opkaf huet, Utopia schonn an enger dominanter Positioun gewierscht wier: "En conclusion, Utopia a renforcé sa position dominante de sorte que toute concurrence effective ou potentielle est désormais exclue sur l'ensemble du territoire luxembourgeois. Utopia pourrait même, potentiellement, exiger des distributeurs le bénéfice de l'exclusivité au détriment des autres salles de cinéma."
De Beamten, deen den Tëscherapport geschriwwen huet proposéiert, datt een eng symbolesch Amende verhänkt a Ciné Belval rëm muss verkaf ginn.
Ongewëssheet
Wéi Kinepolis am November d'läscht Joer Utopia opkaf huet, gouf onsen Informatioune no scho während de Verhandlungen tëscht Kinepolis an Utopia iwwert d'Instruktioun vum Konkurrenzrot diskutéiert. Wat d’Kontrakter fir déi verschidden Eventualitéite virgesinn, ass ons net bekannt. Interessant ass awer, datt de fréieren Utopia-Chef an Aktionär Nico Simon onsen Informatiounen no haut Beroder fir Kinepolis ass.
Am Secteur gi sech elo vill Froe gestallt: Ginn et um klenge Lëtzebuerger Kinosmarché weider Acteuren, déi Interessi an d’Moyenen hätten en eenzelne Kinoskomplex zu Esch ze bedreiwen? Firwat huet de Konkurrenzrot sech net schonn 2012 ageschalt fir der Fro vum Abus de position dominante nozegoen? Ass Kinepolis net vläit frou, fir de Ciné Belval nees ofzestoussen, vu datt de belsche Groupe 2012 keen Interessi um Escher Kino hat?
Méi zum Thema
Exklusiv
Ni vun duebeler Positioun abuséiert
Den Utopia-Actionnaire a fréiere Beamten Joy Hoffmann wiert sech géint Virwërf vun engem Interessekonflikt.
Gouf de Kinosgrupp Caramba benodeelegt?
De Kinosbedreiwer Caramba stécht a finanzielle Schwieregkeeten. Déi regional Kinoe wäre vum Kulturministère benodeelegt ginn, seet den Direkter. Wéi eng Roll spillt de grousse Konkurrent Utopia?
Exklusiv
Zwee Kinoe vum Grupp Caramba sinn zou
De Kinosbedreiwer Caramba Sàrl huet schonn zënter Längerem kee Loyer méi fir de Kinosch an den Ariston zu Esch bezuelt. Den Ariston kéint deemnächst de Proprietaire wiesselen.
