Regierungsëmbildung no Récktrëtt Maggy Nagel Bettel an Arendt an d'Kultur, Hansen gëtt Logementsminister
Déi ëmstridde Ministerin Maggy Nagel ass de Moien zeréckgetrueden. De Walfer Député-Maire Guy Arendt (DP) gëtt als Staatssekretär neie Member vun der Regierung, wou hien de Xavier Bëttel am Kulturministère ënnerstëtzt. De Staatssekretär Marc Hansen avancéiert am Wunnéngsbau zum Minister.
Wéi den 100,7 gemellt huet ass déi liberal Kultur- a Logementsministesch Nagel de Moie während dem Regierungsrot zeréckgetrueden. D'DP-Regierungsmemberen haten hire Parteikolleg Lex Delles proposéiert fir d’Maggy Nagel an der Regierung z’ersetzen. Den 31 Joer alen Député-Maire vu Munneref huet awer refuséiert. "Ech wëll elo net einfach no zwee Joer Buergermeeschter 'Äddi a Merci' soen", sou de Lex Delles am 100,7-Interview.
De Premier Xavier Bettel huet an der Mëttesstonn annoncéiert, datt hien de Kulturressort géif iwwerhuelen. Assistéiert gëtt hien do vum Guy Arendt (DP), deen als Staatssekretär neie Member vun der Regierung gëtt. De Guy Arendt, vu Beruff Affekot, war bis dohin Député-Maire vu Walfer. Fir den Deputéierten aus dem Bezierk Zentrum réckelt de Claude Lamberty an d'Chamber no.
Ëffentlechen Drock wier ze grouss gewiescht
D'Maggy Nagel war ëmstridden, besonnesch wéinst hirer Aarbecht am Wunnengsbau, wou si wäit hannert de Regierungsziler bliwwe wier. Enn Mäerz vun dësem Joer hat si de Staatssekretär Marc Hansen zur Säit gestallt kritt, deen elo neie Logementsminister gëtt. Déi fréier Ministesch wollt hire Récktrëtt, op eis Nofro hinn, net kommentéieren.
Dat huet de Premier Bettel fir si gemaach. “D’Maggy Nagel ass zur Konklusioun komm, datt den ëffentlechen Drock ze grouss war,” sou de Regierungschef virun der Press. Duerch hir Demissioun wéilt si verhënneren, datt de Ministère oder d’Demokratesch Partei zu Schued kommen.
