Patrick Dury Méi Congé oder méi Pei

Als Kompensatioun fir méi laang Referenzperioden, solle Salariéen net just méi Congé kënne kréien, mee eventuell méi Pei. Dat sot de Patrick Dury am Gespréich mam Carole Schimmer. Den LCGB-President ass net direkt op d'Kritik vum OGBL agaang, mee huet nach emol erkläert, wat seng Gewerkschaft gefuerdert hat.

François Aulner

Patrick Dury-2.JPG
"Wëll der Congé oder wëll der Pei hunn?"

Well hien dat neit Pan-Gesetz, sou wéi d’Regierung et elo proposéiert, als “Mogelpackung” beschriwwen hat, gouf de Patrick Dury vum André Roeltgen ferm kritiséiert. Fir den OGBL ass nämlech d’Propos vun der Regierung e groussen Erfolleg fir d’Gewerkschaft a fir d’Salariéen. Wéi soll ee soss d’Roserei vum Patronat erklären, freet den André Roeltgen.

Suen amplaz Congé

Ouni den André Roeltgen oder den OGBL mam Numm ze nennen, huet de Patrick Dury versicht z’erklären, wat den LCGB am Zesummenhang mat méi flexiblen Aarbechtszäite gefuerdert hat.

En Echange fir méi laang Referenzperioden, solle Salariéen an de Betriber kënnen entscheeden, ob se méi Congé kréien oder méi Suen. Wann een nämlech Salariéë géing ofstëmme loossen, da géingen dem LCGB-President no, der vill éischter méi Pei froen, wéi méi Congé.

Kollektivvertrag

Déi nei Dispositioune solle just fir Betriber ouni Kollektivverträg gëllen an dowéinst huet den LCGB gefuerdert, datt d’Verlängerung vun der Referenzperiod just iwwert d’Verhandlung vum Kollektivvertrag méiglech wier. De chrëschtleche Gewerkschaftsbond mengt also am Géigesaz vum OGBL net onbedéngt, datt d’Propos vun der Regierung d’Kollektivvertrags-Wiese géing stäerken.

Well d’Opstelle vu flexiblen Aarbechtspläng während enger Referenzperiod net am Kollektivvertrag festgeluecht géing ginn, mee um Terrain, huet den LCGB och gefuerdert, datt d’Salariéen e Matsproocherecht beim Opstelle vun dëse Pläng solle kréien. “Datt u sech d’Aarbechtszäit-Modeller do kënnen ausgeschafft ginn, déi de Leit entgéint kommen”, sou de Patrick Dury.

PAN a POT

Nodeems Patronat a Gewerkschafte kee Kompromëss iwwert en neit PAN-Gesetz fonnt haten, huet d’Regierung folgendermoossen tranchéiert: En Echange fir de Betriber méi laang Perioden z’erméiglechen an deene flexibel Aarbechtszäite kënnen agesat ginn, sollen d’Salariéë Congé bäikréien. D’Referenzperiod soll vun aktuell engem, op véier Méint eropgesat ginn.

Wéi funktionéiert d’Referenzperiod? E Betrib muss mam Accord vum Personal e Plang opstellen (Plan d’organisation du travail - POT), deen dann zum Beispill esou ausgesäit:

1. Woch 2. Woch 3. Woch 4. Woch
Méindeg 4 Stonnen 10 Stonnen 4 Stonnen 10 Stonnen
Dënschdeg 10 Stonnen 10 Stonnen 4 Stonnen 8 Stonnen
Mëttwoch 10 Stonnen 4 Stonnen 10 Stonnen 6 Stonnen
Donneschdeg 8 Stonnen 4 Stonnen 10 Stonnen 6 Stonnen
Freideg / 10 Stonnen / 6 Stonnen
Samschdeg / 10 Stonnen 10 Stonnen 6 Stonnen
Sonndeg / / / /
Total 32 Stonnen 48 Stonnen 38 Stonnen 42 Stonnen

(source: http://www.guichet.public.lu/entreprises/fr/ressources-humaines/temps-travail/gestion/organisation/index.html)

An der Mediathéik:

Invité vum Dag / / Carole Schimmer
Lauschteren

Programm

Praktesch Infoen

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen