Fundamental, net radikal
Younes, sou wëll de 27 Joer ale Michaël Delefortrie haut genannt ginn. Hien ass an enger kathoulescher Famill an der Banlieue vun Antwerpen opgewuess. Virun aacht Joer, ass hien zum Islam konvertéiert. 2013 war hie sechs Wochen a Syrien, fir um Djihad Deel ze huelen. No sengem Retour hëlt d'Police hie fest. Als Strof kritt hien dräi Joer Prisong op Sursis.
Als Patron vun enger Bäckerei schéngt hien nees een normaalt Liewen ze féieren. Mee säin Discours bleift radikal: "Fir éierlech ze sinn, bedaueren ech et nees hei ze sinn. D'Situatioun huet sech net verbessert. Ech wëll net de-radikaliséiert ginn. Ech sinn orthodox a fundamental. Dat ännert sech net, wann ech Drock gemaach kréien. Am Géigendeel."
De Montasser Alde’Emeh ass och a Syrien gereest, awer mat engem ganz anere Motiv: Den Islamwëssenschaftler mat palästinenseschen Originë wollt den Alldag vun de jonken Djihadiste besser verstoen. Hien huet een Zentrum fir De-Radikaliséierung opgemaach. Zil ass et, fir weider Departen a Syrien ze verhënneren a fir belsch Kämpfer no hirem Retour nees ze integréieren. Leit also, wéi de Younes. Dem Montasser Alde'Emeh seng Method: Nolauschteren ouni ze jugéieren. "Si kënne mat mir schwätzen, hir Gefiller an hir Frustratiounen ausdrécken", seet hien.
Laachen iwwer Terrorismus
Den Auteur, Acteur a Regisseur Ismaël Saïdi verfollegt dat selwecht Zil mat sengem Theaterstéck "Djihad". Aus ursprénglech fënnef geplangten Opféierungen si mëttlerweil iwwer 100 ginn. 40.000 Leit, dovunner d'Halschent Schüler, hunn d'Stéck gesinn. An der Belsch gëllt d'Wierk als Bäitrag zum Effort, fir d'Radikaliséiere vu Jonken ze verhënneren.
Ugangs waren d'Leit awer skeptesch, zielt den Ismaël Saïdi: "Verschidde Leit hu gemengt, mir géifen de Geck mam Islam maachen. Anerer hu gemengt, mir géifen zum Terrorismus rechtfäerdegen. Mee duerno war jiddereen iwwerrascht, well mir et fäerdeg bréngen, dass een am Stéck vill iwwer déi ganz Saach laacht. An d'Laache rassembléiert."
Politesch Äntwerten
D'Radikaliséiere vu Jonker ass och Thema an engem Rapport, deen de 25. November am Europaparlament no villen Ännerungen um Dokument ugeholl gouf. Besonnesch d'Sozialisten hu gefuerdert, net eleng de Sécherheetsaspekt ze beliichten. Déi portugisesch Europadeputéiert Ana Gomes argumentéiert, dass een den Terroristen an d'Hänn spillt, wann ee kee Wäert op d'Rechter an d'Fräiheete vun de Bierger leet.
De Rapport geet an de grousse Linnen awer an eng aner Richtung. E recommandéiert, d'Radikaliséieren um Internet besser ze detektéieren a méi Informatiounen tëscht de Memberstaaten auszetauschen. Anescht wéi de Younes, solle jonk Syrie-Kämpfer no hirem Retour an Zukunft automatesch ënner Kontroll vun der Justiz gestallt ginn.