De Jeff Neuens huet iwwert de Weekend seng Demissioun als Direkter vun der Police judiciaire agereecht. De Minister Etienne Schneider huet d’100,7-Meldung vun dësem Méindeg Moie confirméiert. Eisen Informatiounen no war et während der leschter Reunioun iwwert déi geplangte Policereform, de leschten Donneschdeg, zu engem Eclat komm.
“No där Reunioun vun en Donneschdeg war mir relativ staark kloer, datt den Här Neuens probéiert huet iwwert de falsche Wee Afloss op déi Reformen ze huelen”, sot de Minister fir bannescht Sécherheet dëse Méindeg am 100,7-Interview. Den Direkter vun der PJ hätt “enk mat de Gewerkschaften zesummegeschafft, fir datt déi eng Rei Saache soen a maachen, déi hie gär gehat hätt”. Des weideren hätt hie probéiert, de Procureur général de l’Etat “mat anzespanen, fir datt dee soll bei de Gewerkschafte virstelleg gi fir Drock op d’Regierung ze maachen”.
“PJ-Direkter hätt missten iwwert seng Hierarchie fueren”
Den Etienne Schneider schwätzt vun engem “deloyale” Verhalen. De richtege Wee wier gewiescht, iwwert seng Hierarchie ze fueren, dat heescht de Policedirekter Philippe Schrantz respektiv de Minister. D’Vertraue wier net méi do. No engem Gespréich e Freideg hätt de Jeff Neuens dat agesinn a säi Posten, deen hien zënter November 2015 besat huet, “à disposition” gestallt.
Den LSAP-Minister hätt dem Haaptinteresséierte proposéiert, no sengem Congé de Jeff Neuens ze gesi fir iwwert eng aner Affektéierung ze schwätzen. Souwuel fir de Justizminister Felix Braz wéi och fir hie selwer wier et “net denkbar, datt e weider an der Police judiciaire bleiwe kann”, sou den Etienne Schneider. Iwwert ee Successeur un der Spëtzt vun der PJ hätt een nach net nogeduecht.
Den Etienne Schneider am Gespréich mam Carole Schimmer: