Attentater zu Paräis Regierungsrot decidéiert: Alarm-Niveau gëtt net erop gesat
No den Attentater zu Paräis huet de Premier Xavier Bettel een ausseruerdentleche Regierungsrot aberuff. De Koordinatiounsgrupp, dee fir de Kampf géint den Terrorismus zoustänneg ass, huet der Regierung proposéiert, fir den Alarm-Niveau net erop ze setzen. Op de Garen an um Fluchhafe solle méi Kontrolle gemaach ginn. Iwwerdeems gëtt de franséische Grenzautoritéite bei hire Kontrolle gehollef.
De Sécherheetsniveau hei am Land net erop gesat. Dat huet de Premier Xavier Bettel elo grad nom ausseruerdentleche Regierungsrot erkläert:
Zënter den Attacken op Charlie Hebdo ass zu Lëtzebuerg de Niveau 2 a Kraaft, nämlech der "menace réelle, mais abstraite". All d’Acteure vum Alarm-Niveau 3, dorënner d'Police an d'Arméi, ginn iwwregens mobiliséiert fir sech prett ze halen, wann et zu enger Evolutioun vun der Situatioun kéim. Am Ganze ginn et 4 Alarm-Niveauxen.
Den Héich-Commissaire fir de Schutz vun der nationaler Sécherheet Fränk Reimen war de Mëtte beim ausseruerdentleche Regierungsrot dobäi. Schonn de Moie sinn hei am Land d’Spezialisten zesumme komm, déi sech ëm d’Sécherheet vum Land këmmeren, fir d’Situatioun ze analyséieren.
D’Attentater si mat de schlëmmste Wieder ze veruerteelen, hat de Xavier Bettel de Moien am 100,7-Interview betount. Et misst een elo zesummenhale fir esou Akten an d'Terroristen ze bekämpfen, mat alle Mëttel déi zur Verfügung stinn. Déi franséisch an déi europäesch Grondwäerter misste verdeedegt ginn.
De Verdeedegungs-Minister a Minister fir Banne-Sécherheet Etienne Schneider, deen de Moment zu Washington ass, war per Telefon am Regierungsrot bäi geschalt.
De ganze Regierungs-Briefing:
Méi zum Thema
Ausnahmezoustand a Frankräich
Frankräich ass am "Etat d'Urgence" no der Attentatsserie zu Paräis mat op d'mannst 130 Doudesaffer. De franséische President François Hollande huet den "Etat d'urgence" declaréiert a vun engem "acte de guerre" geschwat.
Reaktiounen no den Attentater
Frankräich ass am "Etat d'Urgence" no der Attentatsserie zu Paräis mat op d'mannst 129 Doudesaffer. Reaktioune vum Premier Xavier Bettel, vum Ausseminister Jean Asselborn, vum Nicolas Sarkozy, vum Marine Le Pen a Lëtzebuerger zu Paräis.
