No zwou Amtszäite vum konservative Boris Johnson, stellen d’Sozialdemokrate rëm de Buergermeeschter vu London. Ma een Dag nodeems hie vereedegt gouf, distanzéiert den neie Buergermeeschter Sadiq Khan sech weider vu sengem eegene Parteichef, a stellt d'Wahlcampagne vum Jeremy Corbyn a Fro. Dobäi sollt de Khan de grousse Liichtbléck fir d’Sozialdemokrate symboliséieren.
D'Partei huet zwar an England keng Gemenge verluer – e positiivt Resultat no vill Skepsis – mee an de schottesche Parlamentswahlen um selwechten Dag gouf et eng zolitt Defaite. Do sinn d'Sozialdemokraten elo nëmmen nach drëtt Kraaft, hannert der Partei fir schottesch Onofhängegkeet an de Konservativen. Déi Konservativ konnten d’Zuel vun hire Sëtzer verduebelen a stelle lo déi gréisst Oppositioun a Schottland.
De Khan wëll Inklusivitéit propagéieren
Dem Khan säin Argument vis-à-vis vun der Parteilinn spigelt déi gréisser Zweiwel bei de Sozialdemokraten erëm: Déi aktuell lénks-orientéiert Approche wier net inklusiv genuch a géif nëmmen déi Wieler uspriechen, déi souwisou scho fir d’Labour Partei stëmmen. Inklusivitéit ass ebe grad deen Image, deen de Khan propagéiere well. Hien ass den éischte muslimesche Buergermeeschter vu London, de Fils vu pakistaneschen Awanderer, an opgewuess an enger Sozialwunneng.
D'Woche virun de Wahlen hunn zum Deel gewisen, wat um Spill stoung fir d’englesch Politik, mee och fir de Mediendiskurs. De konservative Kandidat fir London, de Zac Goldsmith, hat de Khan am Virfeld beschëllegt, islamisteschen Extremisten "Plattformen, Loft, Schutz an Excusë gebueden ze hunn" – als Mënscherechtsaffekot koum de Khan iwwer d’Joere mat islamesche Fundamentalisten a Kontakt. Der Wahlcampagne vum Goldsmith gëtt Rufmord an Islamophobie virgehäit.
Intern Enquête wéinst Antisemitismus
Gläichzäiteg hunn sech d'Sozialdemokrate misse géint Uschëllegunge vun Antisemitismus erklären. No ëmstriddenen Aussoen iwwer Israel an Zionismus vun enger Rei Parteimemberen, dorënner de Ken Livingstone, fréiere Buergermeeschter vu London, huet de Parteichef eng intern Enquête ugekënnegt. Déi grouss Norichteverbänn an England hu währenddeem wéineg Fangerspëtzegefill gewisen: Wierder wéi Antisemitismus, Antizionismus, a Rassismus goufe benotzt, wéi wann si all dat selwecht géingen heeschen.
D’Sozialdemokrate sinn am Ablack eng Partei mat ville Gesiichter, a vir muncher ass de Khan elo schonn dat villverspriechendst.