De Bernd Marcel Gonner gewënnt den 100,7 radiopräis fir säin Hörspill "Grimmia sessitana oder Einfache Seligpreisungen".
Grimmia sessitana ass e seelent Moos, dat just an den Alpen existéiert, erkläert den Auteur. A senger Geschicht gëtt dëst Moos vun Astrobiologe mat an de Weltall geholl. Gläichzäiteg gëtt e jonke Biolog wéinst deem selwechte Moos vun der Police festgeholl. Hie gëtt verdächtegt, Droge bei sech ze hunn. "Dat huet mat menger Virléift fir Leit ze doen, déi vum Rand kommen. Ech hu vill Frënn aus der Punkzeen", seet de Bernd Marcel Gonner.
Säi Stéck géif op ville verschiddenen Niveaue funktionéieren. Et géif Grousses mat Klengem vermëscht ginn, an Einfaches mat Komplizéiertem. "Et geet ëm d'Fro: Wat ass Liewen?", seet den Auteur.
Spill mat Kontraster
"De Bernd Marcel Gonner huet de Jury beandrockt, duerch d'Spill mat Kontrasten a sengem Text a mat sengem subtillen Humor", seet de Claude Mangen, de President vum Jury. "D'Geschicht gëtt mat einfachen awer staarke Sproochbiller erzielt." Donieft wier de Jury begeeschtert gewiescht vum dramaturgeschen Opbau vum Manuskript, vun der perfekter Maîtrise vun der Sprooch a vun der Poesie vum Text.
De Bernd Marcel Gonner, Joergang 1966, ass ee Lëtzebuerger, deen a Baden-Württemberg lieft. Hien huet Germanistik, Konschtgeschicht an Däitsch als Friemsprooch studéiert a schafft, ënnert anerem, als fräie Schrëftsteller. Hien huet Lyrik, Prosa, Kannerliteratur an Theaterstécker op Däitsch verëffentlecht. 2016 krut den Auteur den éischte Präis am Beräich Kannerliteratur, an 2017 den zweete Präis an der Kategorie "erwuessen Auteuren" beim Concours littéraire zu Lëtzebuerg. Donieft krut hie verschidden international Auszeechnungen.
Déi drëtt Editioun vum 100,7 radiopräis stoung ënner dem Thema Great Expectations. De Concours riicht sech all Joer un Auteuren aus Lëtzebuerg an der Groussregioun. Et ginn Texter op Lëtzebuergesch, Däitsch, Englesch a Franséisch acceptéiert. De Präis ass mat 3.500 Euro dotéiert. Dat priméiert Wierk gëtt fir eng Diffusioun produzéiert.
