Hörspill De Radio-Präis 2016

Dëst Joer geet de radio 100,7 Radiopräis an déi zweet Ronn. Op en neits konnten AutorInnen aus Lëtzebuerg an der Groussregioun hir Texter fir den internationalen Hörspill-Concours areechen. D'Initiativ huet déi literaresch Kreativitéit befliggelt. Wéi hunn déi agereechten Texter ofgeschnidden? Äntwerte vum Jurypresident Claude Mangen.

Valerija Berdi / cwi

Claude Mangen
De President vun der Jury Claude Mangen

Zéng Texter, déi fir den 100,7 Radiopräis 2016 agereecht goufen, hunn de Kritären entsprach. Déi krut de Jury – dat ass d'Anette Kührmeyer, den David Raison, de Rudi Schroeder, d'Anne Simon an de Sebastian Thiltges – an hire President, de Claude Mangen, ze liesen. Si hunn diskutéiert, sech beroden an de beschten Text bestëmmt.

Mee wisou rifft de radio 100,7 iwwerhaapt zu engem Hörspillpräis op? Dorop géif et eng ganz einfach Äntwert ginn, mengt de President vum Jury an 100,7 Programmchef, de Claude Mangen. "Den 100,7 ass e Radio an en Hörspill gëtt eben op engem Radio diffuséiert."

D'Traditioun beliewen

Wéi den 100,7 lancéiert gi wier, hätt de Radio eng Rei Hörspiller produzéiert an an Optrag ginn. Dat wier eng Traditioun gewiescht, déi awer iergendwann ënnergaange wier. Du wier d'lescht Joer d'Iddi entstanen, fir en Hörspillpräis ze maachen, erënnert sech de Claude Mangen. Hie gëtt ze bedenken, datt d'Hörspiller an der Lëtzebuerger Radiolandschaft immens rar wieren. Dat wéilt een änneren.

An aneren ëffentlech-rechtlech Radioen, besonnesch am däitschsproochege Raum, hätten d'Hörspiller eng laang Traditioun. "Et muss ee sech virstellen, do waren an de 1960er an 1970er Joere richteg Ensembelen agestallt, fir d'Hörspiller ze produzéieren. Dat hat Lëtzebuerg ni. Mee mir probéieren eise Bäitrag dozou ze liwweren."

Sozial Medien am Fokus

D'Thema vum Hörspillconcours fir 2016 war "Sozial Medien an hiren Impakt op d’Zäit a Kultur". E gesellschaftleche Sujet, deen awer och politesch kéint ausgeluecht an traitéiert ginn, betount de President vun der Jury. D'Thema wier komplex a villfälteg. "Mir selwer, déi an de Medie schaffen, wëssen net ëmmer wat gemengt ass a wéi, wien, wat manipuléiert a gebraucht."

Duerch d'Komplexitéit vum Sujet wier d'Lat héich gewiescht, ma d'Participanten hätten awer gutt Texter ofginn. "Et bleift awer alles méi am privaten, familiären a sozialen Ëmfeld." Op d'politesch Dimensioun wier kee vun den Auteuren agaangen. "Mee et si vläicht keng Journalisten oder Politiker, déi do matmaachen. Et si Schrëftsteller."

D'Texter sinn an den dräi Landessproochen – Däitsch, Franséisch a Lëtzebuergesch – agereecht ginn. Mee och eng Partie engleschsproocheg Manuskripter wieren derbäi gewiescht. Mat de Sprooche jongléiert hätt awer keen, seet den 100,7 Programmchef.

D’Gewënnerin oder de Gewënner – déi oder deen e Freideg den Owend bekannt gemaach gëtt – konnt d’Jury duerch d'Approche vum Sujet fir sech gewannen. "Den Text schafft mat Clichéen, mee en dréit se ëm." Dernieft hätt d'Sprooch iwwerzeegt, verréit de Claude Mangen.


Wéi een Numm a wéi een Text sech hannert dëse Beschreiwunge verstoppen, gëtt de Freiden, 18. November um hallwer 8 am Chapiteau principal zu Walfer devoiléiert.

An der Mediathéik:

Kultur / / Valerija Berdi
Lauschteren

Méi zum Thema

JRRIUE
100,7 Hörspill

JRRUE ass de Gewënner vum radio100,7 Radiopräis 2015. Déi lescht Méint gouf dem Frédéric Zeimet säin Zeenario fir de Radio inzenéiert. Wéi entsteet en Hörspill: Ee Bléck hannert d'Kulissen.

Radioprais2.jpg Exklusiv
RADIO-PRÄIS

E Grupp vu Flüchtlingen, déi an engem Wéngert Aarbecht an en Ënnerdaach fonnt hunn, gi vun den Duerfbewunner verdriwwen.

walfer bicherdeeg.jpg
Walfer Bicherdeeg Spezial

Dës Woch huet zu Walfer rëm alles ronderëm Literatur gedréint, et war schonn déi 21. Editioun vun de Bicherdeeg. Mir bliederen zréck a werfen e Bléck op d'Highlighten dovun.

Zeimet Bettel Poos.jpg
100,7 Radiopräis 2015

De Szenarist huet mat "JRRIUE" déi éischt Editioun vum 100,7 Radiopräis gewonn. Thema vum Concours fir dat bescht Manuskript fir e Radio-Hörspill war “Krieg der Welten”.

Programm

Net verpassen

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen