De Film "Barrage" huet d'Laura Schroeder net just gedréint. Zesumme mat der franséischer Autorin Marie Nimier huet si och d'Dréibuch geschriwwen. Am Film geet et ëm eng Mamm-Duechter-Bezéiung. De Personnage vun der Catherine, gespillt vun der Lolita Chammah, war zéng Joer vun der Bildfläch verschwonnen a sicht nees de Kontakt mat hirer Duechter. Si hat hiert Meedchen, deemools e Puppelchen, bei hirer eegener Mamm gelooss.
Hir Mamm um Ecran ass och hir Mamm am richtege Liewen a gëtt gespillt vun der franséischer Schauspillerin Isabelle Huppert. Dat klengt Meedche gëtt vun där talentéierter Thémis Pauwels gespillt.
Am Ufank kritt een net erkläert, wéisou d'Catherine elo hiert Kand wëll erëmgesinn a wéisou si deemools fortgaangen ass. Si ass eng mysteriéis Figur.
Kidnapping vun der eegener Mamm
Der Cineastin Laura Schroeder no hätt si hire Schauspillerinnen eng gewëss Fräiheet gelooss, fir hire jeeweilege Personnage opzebauen.
"Wann d'Schauspiller d'Sätz geännert hunn, hunn ech näischt gesot. Ech fanne gutt, wa si sech der Roll uneegnen. Fir mech ass dat eng Fräiheet, wann een hinnen net seet, wéi si wat ze maachen hunn."
Am Film reagéiert dat klengt Meedchen oflehnend op seng Mamm. D'Groussmamm schéngt d'Enkelin virun hirer Duechter schützen ze wëllen. D'Mamm vum Kand entscheet sech kuerzer Hand, dat Klengt op en Ausfluch an den Norden op de Stauséi matzehuelen, mä am Fong ass et e Kidnapping. Am Bësch beim Waasser ginn al Wonnen nees op, mä d'Catherine schéngt op eng Reconciliatioun ze hoffen. Déi dräi grouss Fraerolle komme beieneen, wéi d'Groussmamm zoustéisst.
Eng souverän jonk Actrice
D'Laura Schroeder huet fir d'Roll vun deem klenge Meedchen d'Thémis Pauwels gewielt, dat si un de Personnage am Film erënnert huet. Déi jonk Actrice huet sech am Film souverän nieft deenen zwou experimentéierte Schauspillerinne behaapt. Een Androck, deen och d'Lolita Chammah hat.
"Et war faszinéierend ze gesinn, wéi d'Thémis d'Saachen direkt verstanen huet. Zum Beispill d'Aart a Weis, wéi hatt d'Catherine gesinn huet, dee Personnage, dee sech mat komplizéierten Emotioune géigeniwwer senger Duechter ausernee setzt."
Net just d'Mamm am Film
Op der Berlinale gouf an der Kritik dacks ervirgehuewen, datt d'Isabelle Haupert net just am Film der Lolita Chammah hir Mamm ass. Wann een de Film kuckt ass et awer net esou, datt een déi ganzen Zäit misst dorun denken. A wann iergendwou géif stoen, datt d'Thémis Pauwels der Lolita Chammah hir biologesch Duechter wier, da géif een dat bei der Visioun vum Film jiddefalls och net a Fro stellen.
"De Casting funktionéiert, well d'Thémis och an eis richteg Famill passe géif. Hatt huet ganz natierlech an déi Roll mat senger Spill-Mamm eragepasst."
Géint der Enn kritt "Barrage", mat der Natur ëm de Stauséi, eng ganz verdreemten Atmosphär. Een Ament gëtt se ganz dominant, wann déi dräi Figuren, all fir sech, an där Natur op der Sich sinn. Fir d'Laura Schroeder ass et eng Wanderung vun den dräi Fraen, déi hire Wee do sichen. Si hätt Loscht gehat, der Natur esou eng Roll ze ginn.