Kultur Drama & Tenderness am MNHA

"Drama and tenderness": deen Titel mécht am Kapp scho Plaz fir ganz vill Biller. Mee ganz onofhängeg dovunner, op ee mat Barock eppes ufänke kann oder net, well een un iwwerluede Konscht an also Iwwerfuerderung denkt, déi gutt 30 Wierker am Nationalmusée hunn et a sech. Dat gesäit een do nach vill besser ewéi an engem Louvre oder der Tate, well een den Aarbechten op dem méi enke Raum vill méi no kënnt. D'Ausstellung am MNHA war allerdéngs keng Selbstverständlechkeet, seet de Manfred Sellink, Direkter a Chef-Conservateur vum Musée Royal des Beaux-Arts Anvers.

Vill Informatioun geet verluer

Zanter den Ufäng vun der Konschtgeschicht am 19. Joerhonnert ass Konscht repertoriéiert a klasséiert ginn. An zwar meeschtens no geografeschen a chronologesche Critèren. Dobäi geet fir den Nico Van Hout, ee vun den dräi Commissairë vun der Expo Drama and Tenderness, a Conservateur fir d'17. Joerhonnert am Musée Royal des Beaux-Arts Anvers, vill Informatioun verluer. Zum Beispill ginn déi international Aflëss, déi d'Moler während Auslandsopenthalter matkritt hunn, negligéiert, d'Inspiratioun duerch d'Reesen. D'Similituden tëscht der flamännescher, der spuenescher an der italienescher Konscht am Barock sollen op der Ausstellung kloer ginn.

Emouvant Portraiten, Nature morten am Stil vum "Clair-obscur"

Reliéis Zeenen am grousse Format, déi am Optrag vu Kierchen entstane sinn, däischte Nature morten an extremer Präzisioun, bal wéi aus dem botanesche Léierbuch, dräi impressionnant, well emouvant Portraite vu Philosophen. An déi grouss Meeschter hannendrun: Rubens, Van Dyck, Jordaens oder Ribera a Zurbaran. All d'Facette vum Barock an den zwee Kapitelen "Drama and tenderness", stellvertriedend fir zwou Moltechniken: Éischtens de "Clair-obscur", also d'Experimentéiere mat der Luucht an zweetens d'Spill mat de Faarwen.