Kulturhaaptstad Esch 2022: Christian Mosar net méi artistesche Leeder
De Christian Mosar ass net méi artistesche Leeder vun Esch 2022. Dat huet de Verwaltungsrot haut zesumme mam Christian Mosar decidéiert, heescht et an engem Communiqué vun der ASBL Esch 2022.

Hien hätt an deem leschten annerhallwe Joer als Directeur artistique kënnen e kompletten a variéierte Kulturprogramm opstellen, sot de Christian Mosar an enger éischter Reaktioun. Hien hätt säin Deel bei Esch 2022 erfëllt. Him hätte sech elo och aner Opportunitéite gebueden, dofir wéilt hien elo en neie Wee aschloen.
D'Programm-Ekipp, mam Françoise Poos un der Spëtzt, wäert sech an Zukunft ëm d'Weiderentwécklung an d'Ëmsetzung vum Programm këmmeren. Donieft soll d'Ekipp och vun externe Partner gestäerkt ginn, virun allem vun de Mataarbechter vun den Kulturservicer an de Gemengen, déi beim Projet Esch 2022 matmaachen.
Zanter der Nominatioun vun der Françoise Poos op de Posten vun der Programmcoordinatrice war et roueg ginn ëm de Christian Mosar, deen eis seng Demissioun confirméiert huet.