Kulturhaaptstad Esch 2022 - Wéi geet et weider?

Déi nei Equipe, déi d'Rudder vun Esch 2022 iwwerholl huet, ass nach net komplett. D'Sich no enger Finanz- an Administratiounsdirektioun schéngt net einfach ze sinn. Am Moment setzen d'Generaldirectrice Nancy Braun an den artisteschen Direkter Christian Mosar zu Déifferdeng, well nach keng Büroen zu Esch disponibel sinn. Trotzdeem gëtt elo mat der neier Kommunikatiounspersoun versicht am Dossier Esch 2022 weiderzekommen. D'Nancy Braun verréit méi am Gespréich mat der Valerija Berdi.

Valerija Berdi / cz

Nancy Braun
Nancy Braun (Foto: Archiv)

Vu fënnef Posten, déi fir d'Leedung vun Esch 2022 ausgeschriwwe gi sinn, sinn der elo dräi besat. Zanter September 2018 ass d'Nancy Braun d'Generaldirectrice. Elo sinn am Dezember mam Christian Mosar als artisteschen Direkter an der Marie Dembski als Direktiounsassistentin zwee weider Poste besat. D'Plaze vun der Finanz- a vun der Administratiounsdirektioun sinn awer nach eidel.

"Elo si mir epauléiert fir déi méi administrativ Aarbechte kënnen ze iwwerhuelen. De Finanz- an Administrativdirekter sinn nach net fonnt, mee do gëtt un enger Solutioun geschafft", seet d'Nancy Braun. Si hätten e Wee fonnt fir dat intern ze reegelen. Am Moment kéint alles intern koordinéiert, geréiert a strukturéiert ginn.

Keng permanent Büroen

Et sinn ëmmer zwou Stied, déi den Titel vun der Europäescher Kulturhaaptstad kréien. Am Joer 2022 ass dat nieft Esch an de Südgemengen déi litauesch Stad Kaunas. Kuckt een do den Organigramm, dann entdeckt een 39 Gesiichter, déi am Asaz fir d'Joer 2022 sinn. Esch huet am Moment also dräi Leit an awer och nach kee Büro zu Esch, well do nach keng adequat Plaz fonnt gouf. Dofir sëtze si am Ablack zu Déifferdeng, an de Gebailechkeete vum 1535.

"Dat ass wierklech temporär an et soll esou kuerz wéi méiglech bleiwen. Wann een esou zesummeschafft ass et wichteg, datt een zesummesetzt, fir datt ee sech echangéiere kann."

Hëllef vun externe Partner

Déi éischt Aarbecht, déi elo gemaach gëtt, ass d'Virbereedung vun engem Appel à projets, erkläert d'Nancy Braun. Extern Partner, Porteurs de projets, Associatiounen a Strukture solle beim Kulturjoer matmaachen. D'Equipe kéint jo net alles selwer an d'Weeër leeden an organiséieren, dofir wieren déi extern Partner elo gefuerdert.

Weider mussen nach d'Kritäre festgeluecht ginn, déi eng Participatioun erlaben an da géife si och elo probéieren, déi Notioun vum Remix méi konkret ze erklären, wat si sech elo konkret drënner virstellen, "fir datt een net esou am Flou ass an datt wann ee sech Gedanken ëm säi Projet mécht, wann ee wëllt matmaachen, datt een och direkt weess, dat ass dat, wat erwaart gëtt."

Weider Plaze ginn ausgeschriwwen

Et sollen och elo am Laf vum Mount nach Plazen ausgeschriwwe ginn. E wichtege Posten ass dee vun der Kommunikatioun. Wann dee bis besat wier, da kéint och konkret un der Strategie geschafft ginn, sou d'Nancy Braun. Si confirméiert, datt d'Welt an e puer Méint scho ganz anescht wäert ausgesinn.

Och wann d'Internetsäit vun Esch 2022 ganz wéineg bis guer keng Informatioune bitt an och nach keng Ulafstell fir d'Leit existéiert, déi iwwer de Projet vun der Europäescher Kulturhaaptstad méi wëlle gewuer ginn, sou sinn déi Responsabel disponibel fir op all Fro ze äntweren, iwwer Telefon, E-Mail oder op Rendez-vous.


Den integralen Interview mat der Nancy Braun vun der Valerija Berdi:

Lauschteren

An der Mediathéik:

Kultur / / Valerija Berdi
Lauschteren

Méi zum Thema

Claude Frisoni
Europäesch Kulturhaaptstad

Hie schätzt d'Aarbecht vun de Coordinateure fir de Projet Esch 2022. Dat seet de Claude Frisoni, de fréiere Coordinateur vu Lëtzebuerg Europäesch Kulturhaaptstad 1995. D'Politiker sollte sech net an de Projet amëschen.

Janina Strötgen an Andreas Wagner
Esch 2022

Den Escher Buergermeeschter huet d'Janina Strötgen an den Andreas Wagner an engem Interview schaarf kritiséiert. De Roberto Traversini an den Dan Biancalana stelle sech awer hannert d'Coordinateuren.

Vu lénks no riets: Pim Knaff, Ralph Waltmans, Andreas Wagner, Guy Arendt.
Esch 2022

D'Gemeng Käerjeng hätt eng positiv Approche géintiwwer der Participatioun un Esch 2022. Et misst elo en transparente Mapping fir all Gemeng a vun alle Projeten erstallt ginn, seet den Andreas Wagner.

Protestpiquet Esch 2022
Europäesch Kulturhaaptstad

Esch2022 wier gepräägt vu finanziellen Onkloerheeten a schlechter Kommunikatioun, soe verschidde Buergermeeschteren. Si fuerderen eng méi kloer Kompetenzopdeelung a méi Vertrauen tëscht all de Parteien.

Janina Strötgen an Andreas Wagner
Europäesch Kulturhaaptstad

Et gëtt spannend Enn dës Joers, wann d'Decisioun geholl gëtt, ob Esch am Joer 2022 de Label als "Europäesch Kulturhaaptstad" kritt oder net.

Programm

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Weltfraendag 2019

    1911 gouf et den éischte Weltfraendag, zanter 1921 gëtt en den 8. Mäerz gefeiert. A méi wéi 25 Länner, déi meescht dovunner an Asien an Afrika, ass et mëttlerweil e gesetzleche Feierdag.

Communiquéen

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen