Radioen

On air

Notturno  |  Mathieu Clement Sextet - Coming Home

play_arrow Live
arrow_back_ios

100komma7.lu

100komma7.lu

/ Iwwer d'Demokratieverständnis vum brasilianesche Staat

Democracia em Vertigem

Iwwer d'Demokratieverständnis vum brasilianesche Staat

De Rietsruck am weltwäite Politbild ass onëmstridden. Mee ofgesinn vun de ganz illustere Personnagen - wéi deem am Wäissen Haus oder deem an Italien oder potenziell deem op 10 Downing Street - esou kapsuléiert d'politesch Bild vum brasilianesche Staat net just dëse soi-disante Rietsruck, mee niewebäi och Aushiewele vum Demokratieverständnis. Dat ass de Sujet vum Documentaire "The Edge of Democracy" - "Democracia em Vertigem" op Portugisesch - vun der jonker Realisatrice Petra Costa. Den Tom Dockal huet de Film gesinn.

auto_stories

2 min

Eng Presidentin vun hirem Posten enthuewen, ee President am Prisong. Dat ass de Bilan vun enger 30 Joer jonker brasilianescher Demokratie. Wéi et esouwäit konnt kommen, deem versicht d'Dokumentaristin Petra Costa op hir Manéier op de Fong ze goen.

"The Edge of Democracy" ass also d'Geschicht vum mouvementéierte brasilianesche Politbild - vu Militärdiktatur an den éischte Versich, déi mat representative Demokratieversich auszetauschen - et ass virun allem d'Geschicht vun der Aarbechterpartei, dem Lula a brasilianescher Sozialdemokratie, et ass d'Geschicht vun der éischter Presidentin Dilma Rouseff an et ass d'Geschicht vun der Realisatrice Petra Costa, déi intelligenterweis refuséiert, d'Illusioun vun der objektiver Dokumentaristin oprechtzëerhalen.

"D'brasilianesch Demokratie an ech duechten, wa mir allebéid an eisen 30er wieren, da wiere mir an dréchene Dicher a géifen op festem Buedem stoen" esou eng vun den éischte Usoen vun der Costa. D'Duechter vu Revolutionären an d'Enkelin vun Entrepreneuren, déi zu Diktaturzäiten enorm Muecht a Sue geschäffelt hunn, gesäit sech net just an engem Land, dat zerrass ass vu Korruptioun an Korruptiounsvirwërf, mee ass genee esou Zerrass an hirer - absolut privilegiéierter - Positioun an enger a genee esou an zwee zerrappter Famill.

Eng Geschicht vun der brasilianescher Politik a vun den USA

Mat hirer eegener Stëmm als Voix-Off begleet d'Realisatrice duerch d'politesch Geschicht vun der brasilianescher Politik - ass do natierlech mat engem ABC equipéiert, deen engersäits Leit ze informéiere weess, déi hir Blécker nach ni a Richtung Brasilie geworf hunn, mee virun allem gëllt de Bléck a Richtung US-Amerika. Mee wie weess, wéini esou en Documentaire en einfache Portrait oder e Blueprint fir e beängschtegenden Trend an der Welt oder carrement e Wecker fir eng Natioun sinn. Et ass sécherlech keen Zoufall, datt Netflix dës dokumentaresch-subjektiv Aarbecht no senger Première zu Sundance opkaf huet. Wien och ëmmer d'Decisiounkraaft huet fir "The Edge of Democracy" ze kafen, huet an der Costa hirem Film gesinn, datt et nieft Brasilien am Fong ëm d'USA geet. Vläicht geet et Amerikaner eventuell ëmmer just ëm si, och wann et manifestement net ëm si geet, mee vläicht ass et d'Notioun vum Eloge a Schwanegesank op d'Demokratie, déi nieft aller Roserei an aktivisteschem Geste dem Film inherent bäiläit, déi de Bols vun den amerikaneschen Netflix-Distributeure gefillt huet.

"The Edge of Democracy" ass op alle Fall e spannenden Documentaire, dee sech net ze schued ass, ee mat Personnagen an Detailer ze bombardéiere fir d'Mechanismen an d'Aushiewele vun der awer schlussendlech labiller Demokratie-Notioun ze weisen. Well, wéi mat allem, ass d'Demokratie-Versteesdemech schlussendlech eng Affär vu Glawen.