Richteg erfrëschend? D'Curatrice Fanny Weinquin huet hir Summer-Expo am Walfer CAW "Il fait froid" gedeeft. D'Konschthistorikerin schafft zanter 2011 déi historesch Sammlunge vun den zwee Muséeë vun der Stad Lëtzebuerg op, war donieft an der Wild Project Gallery aktiv a fir de Volet plastesch Konscht um Food for your Senses Festival zoustänneg. Zzanter zwee Joer baut si sech en zweet Standbeen als onofhängeg Curatrice an Ausstellungscommissairin op.
Duerch hir verschidden Aufgabe konfrontéiere sech al an nei Konscht permanent an der Fanny Weinquin hire groen Zellen. Points de départ fir hir Ausstellung am CAW waren de Kënschtler Ben Heyart an de Sujet Natur.
Archivaresch Aarbecht als Basis
Dem Ben Heyart seng Naturmolereien, Grafiken an Tusche sinn tëscht 1984 an 1995 entstanen. Eng kuerz Period, gekuckt op seng ganz Carrière. No senge Konscht-Studien zu Paräis a Bréissel huet de Ben Heyart bis zu sengem Doud 2009, mat 82 Joer, net just verschidde Phasen a Stiler getest, nieft dem Molen huet hie sech fir Mosaiken a Glaskonscht-Fënsteren interesséiert. Vun 1957, also vu sengem 30. Liewensjoer un, war de Ben Heyart och Proff am Stater Jongelycée an am Kolléisch.
Hien huet also extrem organiséiert misse sinn, eng Tatsaach, déi der Fanny Weinquin nawell zegutt komm ass. Dank senger archivarescher Aarbecht, dem Inventaire vun de Wierker mat Fotoen, Dimensiounen, Joergäng, jo esouguer den Nimm vun de Keefer, houng - och mat der Hëllef vu senger Famill - net alles, mee dach der Fanny Weinquin hir Coups de coeuren op eemol zu Walfer un der Mauer. Fir datt e méistëmmegen Dialog ronderëm de Ben Heyart entstoe géif, huet d'Fanny Weinquin him dräi aktuell Kënschtlerinnen un d'Säit gestallt, jee no Espace eng vun hinnen, zwou oder allen dräi.
Eng omnipresent Natur
Déi polnesch-lëtzebuergesch Kënschtlerin Katarzyna Kot-Bach huet eng ganz sensibel, philosophesch a literaresch Approche zu der Konscht. Si sculptéiert mat natierleche Materialien, déi d'Natur hir schenkt. De roude Fuedem duerch hiert Wierk ass den Zyklus vum Liewen. D'Fotografin Néckel Scholtus ass op engem Bauerenhaff opgewuess. D'Natur ass an hirer Konscht omnipresent. Déi franséisch Plasticienne Morgane Britscher, eng Artistin aus dem Ausland wollt d'Fanny Weinquin schonn hunn interesséiert sech staark fir Identitéitsfroen a wëssenschaftlech Elementer ronderëm d'Natur. Plus dem Ben Heyart seng Aarbechten mécht véier verschidde Gedanken a véier verschidden Approchen zu engem Thema a véier verschidden Disziplinnen: Molerei, Foto, Video, Skulptur an Installatioun dialogéieren an deene verschiddenen Ausstellungsraim net just frëndlech mateneen ënnerteneen, si alimentéiere sech géigesäiteg, inspiréieren. Fir den optimale Choix vun de Wierker, déi optimal Zeenografie huet d'Curatrice Fanny Weinquin sech an hire Kënschtlerinne Raum an Zäit gelooss. Si huet zum Beispill den dräi Dammen Ausstellungskataloger iwwerlooss, fir datt si sech a Rou zu hirer Contributioun Gedanke maache kéinten. Kuerz drop sinn éischt Proposë komm, déi véier hunn zesummen diskutéiert an och zesummen ideal Kombinatioune fir de CAW gesicht a fonnt.
D'Fanny Weinquin huet also näischt iwwer de Knéi gebrach, an dat spiert een. Tëscht der Expo "Il fait froid" an der Iwwerzeegung, datt dem Lidderhanes bei der Aarbecht kal gëtt, existéiert kee Lien.