D'SES, d'Chambre de Commerce an d'Post hätten de Projet mat jee 2,5 Milliounen Euro ënnerstëtzt. 5,8 Milliounen hätt ee kënne recuperéiere vun der Liquidatioun vun Luxembourg for Business. Den nationale Kulturfong FOCUNA investéiert iwwerdeems ronn 350.000 Euro. Insgesamt géingen deemno 38,3 Milliounen Euro an de Lëtzebuerger Projet fir d'Weltexpo fléissen.
An der nächster Etapp gouf e GiE, e Groupement d'intérêt Economique gegrënnt, dee seng Aarbecht am Januar 2017 opgeholl huet. Zesumme mat der Administration des bâtiments publics gouf dunn ee Cahier de Charges opgestallt an en Appell à projet lancéiert, fir dee 19 Projeten erakomm wieren. De Projet vu Metaform gouf als eenzege vum Comité de Selektioun zréckbehalen. D'Form vum Möbiusband hätt iwwerzeegt, virun allem am Hibléck op de Slogan vun der Weltausstellung Connecting minds, creating the future.
Zesumme mat de Partner a mat der Virstellung vun der Regierung am Hannerkapp, gouf dunn de Projet konkret ausgeschafft. D'Geschicht vun engem oppenen, fiabelen an dynamesche Lëtzebuerg sollt erzielt ginn.
Nohaltegkeet gëtt ënnerstrach
De Pavillon selwer gëtt aus Stol, Glas, Holz an aner Materialie gebaut, ganz am Sënn vun der Économie circulaire. En Deel vum Pavillon soll och nees zréck op Lëtzebuerg kommen, deen nom Wonsch vum Wirtschaftsminister Etienne Schneider an e Space Center soll ëmfonctionnéiert ginn. De Minister géing nach virun der Weltausstellung annoncéieren, wou deen Deel vum Pavillon hikënnt.
Kulturelle Programm
Siwe Konschtdisziplinnen, dorënner Theater, Danz a Musek sollen de Konschtprogramm vum Januar un assuréieren. Bedeelegt Artiste sinn ënnert anerem d'Julie Konrad am Design, de Guy Helminger fir d'Literatur an d'Simone Mousset fir den Danz.
De Jo Kox hätt iwwerdeems d'Iddi proposéiert, fir de Konschtprogramm net nëmmen op déi sechs Méint ze beschränke während deenen d'Weltausstellung leeft. Deemno soll de Konschtprogramm nach dëse Januar ufänken. Den nationale Kulturfong FOCUNA investéiert ronn 350.000 Euro an dee permanenten Deel vun der Konschtausstellung an an d'Evenementer.