Neie Krimi vum Tom Hillenbrand Militäresch Strategie aus dem Gastro-Guide

Et ass déi fënnefte Kéier, datt aus dem Lëtzebuerger Kach Xavier Kieffer, mat sengem gemittleche Restaurant "Deux Eglises" am Stadgronn, eng Zort gastronomesche Sherlock Holmes gëtt. Den Tom Hillenbrand huet awer nei Aspekter mat an de Roman bruecht. Ënner anerem historesch Elementer, op deenen déi spannend Geschicht opgebaut ass. Ausserdem spillt d'Handlung dës Kéier op verschiddene Zäitniveauen.

Kulinaresche Guide am Zweete Weltkrich

D'Haaptroll géif des Kéier ee franséischen Guide gastronomique spillen, erkläert den Tom Hillenbrand: De Guide Gabin. Deen ass deene meeschte Xavier Kieffer-Fans wahrscheinlech schonn aus deene leschte Bicher bekannt. An enger Editioun vum Gabin vun 1939 verstoppt sech ee Geheimnis, wat mam Zweete Weltkrich zesummenhänkt. A wéi dat muss sinn: Et stierwe Leit, Bicher verschwannen an de Xavier Kieffer muss déi ganz Saach opklären.

Den Tom Hillenbrand beschäftegt sech net mat der Scholdfro. Et geet ëm den Aspekt vum franséische Gastro-Guide, dee "kriegswichtig" gëtt. D'Virbild wier natierlech de Guide Michelin. D'Kaartematerial do dra wier immens detailléiert gewiescht. Dat wier souwuel fir d'Nazien an d'Wehrmacht, wéi och fir d'Alliéiert eng wichteg Informatiounsquell gewiescht. Déi Däitsch hätten d'Kaartematerial aus dem Michelin benotzt.

D'Geheimdéngschter an de Mëssbrauch vun hirer Muecht ass een aneren Aspekt, deen den Tom Hillenbrand am neie Roman interesséiert. "Datt mir u sech guer keng Kontroll méi driwwer hunn, wat déi do maachen. A wat eis Gesellschaft méi digital gëtt, wat et och wahrscheinlech éischter méi schlëmm wéi besser wäert ginn", fäert den Auteur.

Verfilmung vum Debut geschwë Realitéit?

"Gefährliche Empfehlungen" ass ee reusséierte Krimi. En ass kuerzweileg, spannend, informativ a gutt ze liesen. Dobäi kënnt, datt d’Personnagen aus de leschte Bicher och nees derbäi sinn. D'Figuren hunn alleguer hiren eegene Charakter a gi präzis beschriwwen. An datt dem Tom Hillenbrand säi kulinaresche Krimi ukënnt, weist deen ëmmer méi konkrete Projet fir deen éischte Roman "Teuflesfrucht" mam Moritz Bleibtreu ze verfilmen.

Grad géif de Casting lafen a bei der Finanzéierung géifen déi lescht Detailer gekläert ginn. Wann elo alles klappt, wier de Lancement wahrscheinlech nach am Fréijoer. Den Tom Hillenbrand ass ganz optimistesch. De Film soll och vu Lëtzebuerger gemaach ginn. Deemno kéint een eng gewëss "Werkstreue" erwaarden.