Museksindustrie "Net einfach, dee Wee ze goen"

"Mir stiechen nach an de Kannerschong, awer de Wëllen ass do, fir einfach méi wäit ze goen", seet de Sacha Hanlet, Batteur bei Mutiny on the Bounty a Sänger vun Them Lights. D'Lëtzebuerger Musekszeen hätt Retard par Rapport zum Ausland. "Mir schaffen alleguer drun, fir déi Industrie ze kreéieren", seet den Giovanni Trono vum Exportbureau Music:LX.

En Ecosystem ronderëm den Artist

Wéi eng Strukture feele konkret zu Lëtzebuerg? Als Museker bräicht ee fir d'éischt eng Booking-Agence, déi engem Concerten organiséiert, seet de Sacha Hamlet. Virun allem am Ausland. E Label an eng Distributioun wieren och gutt ze hunn. Och wann dat hautdesdaags net méi onbedéngt noutwenneg wier. Ee Manager, dee sech ëm den administrative Volet bekëmmert, géif de Museker enorm entlaaschten.

Dës Beruffer missten zu Lëtzebuerg méi promouvéiert ginn, seet de Sam Reinard, Responsabele vum Rocklab. "Dat wäert de kënschtleresche Propos op den nächste Step bréngen."

(Nach) keng Lobby

D'Onkäschten als Independant wieren enorm, seet de Sacha Hanlet, deen de Statut vum Intermittent du spectacle huet. "An engem Land, wou d'Liewen immens deier ass, ass et net einfach, dee Wee ze goen. Dat ass ee vun de Grënn, firwat vill Leit sech net woen, dee Schrëtt ze maachen." D'Museksbranche misst sech eng Lobby schafen, fir zum Beispill steierlech Avantagen oder besser TVA-Tauxen ze fuerderen, seet de Marco Batistella.

De Creative Cluster wier eng Méiglechkeet, fir am ekonomesche Beräich Sensibilisatioun ze bedreiwen, seet de Sam Reinard. "Et geet ëm Leit, déi mussen hir Rechnungen um Enn vum Mount bezuelen." Zu Lëtzebuerg hätt een zwar net déi Zeene parat, wéi an enger Groussstad, awer d'Musek wier eng Optioun. "An enger Welt, déi vernetzt ass, déi Internet-baséiert ass, spillt d'geografesch Positioun ëmmer manner eng Roll." Lëtzebuerg wier eng gutt Basis, awer et misst een als Museker seng Reseauen am Ausland opbauen.

Eng nei Fërderstruktur?

"De Ministère ass sech och bewosst ginn, datt et net nëmme Klassik zu Lëtzebuerg gëtt", seet de Marco Batistella, deen am Kulturministère de Museksecteur betreit. Initiative wéi Music:LX an d'Rockhal hätten dozou gefouert, datt d'Popmusek haut besser opgestallt wier, wéi viru 15 Joer. De Staat misst den néidege Kader schafen, fir eng Museksindustrie z'erméiglechen. Et géif Iwwerleeunge ginn, fir en Instrument ze schafen, wat lassgekoppelt vum Ministère kéint iwwer Hëllefen decidéieren.