Filmfestival Cannes "Okja" - eng Netflix Produktioun
Wéinst enger technescher Pann gouf de Film "Okja" e Freiden als éischt eemol ausgebuht. Ma zum Schluss krut de südkoreanesche Film vill Applaus. De Film, deen an er Haaptkompetitioun leeft, huet dëst Joer fir déi gréisste Polemik op der Croisette gesuergt, well e vun der Streaming-Plattform Netflix produzéiert gouf.
De Film erzielt d’Geschicht vun engem klenge koreanesche Meedchen a seng Frëndschaft zu engem super intelligente riise Schwäin , d'Okja. D'Déier gouf an den USA vun enger Biotech-Firma entwéckelt an a Korea geschéckt fir datt et do vun enger Famill groussgezu gëtt. Dat Ganzt mam Zil, d’Schwäin herno ze schluechten a bëllegt Fleesch ze produzéieren.
Et war scho bal wéi een Zeechen: Wéi dem Bong Joon-ho säi Film sollt ugefaangen, gouf et e Fehler bei der Projektioun. Grad bei deem Film, dee vun Ufank u fir grouss Opreegung gesuergt huet. Net jidereen war domat averstan, datt de Film an der offizieler Competitioun dierf matmaachen. Zu de Géigner zielt och de President vum Jury Pedro Almodovar. E Film, dee vun enger Streaming-Plattform finanzéiert gouf an deemno wéi och net wäert um groussen Ecran laafen dierft net esou en Valeur gesat gi war d'Begrënnung.
Um Enn, dach en Erfolleg
No der Projektioun gouf et dann awer just nach groussen Applaus fir e schéine Film mat grousse visuellen Effekter. Vun de Spectateuren erwaarden sech der vill méi Flexibilitéit wat d’Distributioun u geet. Et wier gutt, datt den Debat elo op wier.
De Bong Joon-ho war zefridden iwwert d’Zesummenaarbescht mat Netflix. Hien hätt nach nie esou e grousse Budget an eng esou grouss Fräiheet vun engem Produzent kritt. Déi Responsabel vum Filmfestival zu Cannes hunn elo allerdéngs decidéiert, datt nächst Joer keng Filmer méi dierfe matmaachen, déi dono net an de Kino kommen.
Méi zum Thema
Deen neie Film vum Stephen Gaghan ass "sans plus"
Mat "Gold" bréngt de Stephen Gaghan eng Geschicht op den Ecran, déi zwar ganz agreabel ze kucken ass, mä déi all Mënsch schonn op d'mannst 100 mol gesinn huet, mengt den Tom Dockal.
"De klenge Mann vs de grousse System"
De bulgaresche Film "Glory" stellt déi mënschlech Relatiounen an engem ongerechte System an de Mëttelpunkt. En éierlechen a beweegende Film. Interview mam Haaptacteur a Co-Zeenarist.
Virtuell Realitéit am Kino
''Virtual Reality'' ass am Trend. Fir de Kino ass déi nei Technologie eng grouss Erausfuerderung. Cineaste mussen ëmdenken. Hei sinn déi wichtegst Ännerungen, déi d'virtuell Realitéit mat sech bréngt.
