Fotografie Philippe Matsas - Den Eye-Catcher

De Philippe Matsas, 1962 zu Lëtzebuerg gebuer, ass ee bedeitende Fotograf. Hien ass virun allem op Portraite vu Mënsche spezialiséiert, déi schreiwen a publizéieren. "Dat si Politiker, Soziologen, Philosophen, Romancieren, Poeten, Leit déi Temoignage maachen... et ass wierklech ganz divers", erkläert de Philippe Matsas. Hie géif awer och fir d'Press oder verschidden Institutioune schaffen. Et wär wichteg, datt seng Aarbecht ofwiesslungsräich wär, awer et misst ëmmer ëm Mënsche goen.

D'Gesiichter vum Henning Mankell, James Ellroy, Michel Tournier, Siri Hustvedt, Günter Grass, Dougas Kennedy a Martin Walser huet hie mat senger Kamera festgehalen. De Figaro, Le Monde, d'Neue Züricher Zeitung, de Spiegel, d'Libération, de magazine littéraire, fir just déi ze nennen, hunn déi Portraiten gedréckt. Op de Bicher vu Khalida Messaoudi, Jim Harrison, Peter Sloterdijk a Michel Houellebecq a ville méi droen d'Titelbiller d'Ënnerschrëft vum Lëtzebuerger Fotograf.

Eng Carrière, déi net geplangt war

Dobäi war dës Carrière net geplangt. Am Fong hätt hie wëlle Film maachen, seet de Philippe Matsas. Hie goung dunn awer zu Léck op eng Schoul fir Fotografie a Film, wat him finalement besser gefall huet: "Ech sinn een, dee relativ onofhängeg ass. Fir ëmmer vu grousse Projeten ofhängeg ze sinn, wär mir net sou gutt bekomm." Fir seng Ofschlossaarbecht iwwer d'Altersheimer zu Lëtzebuerg krut hien de Prix de la photographie. An hien huet um Fotosbuch "D'Liewen am Minett" matgeschafft.

An enger Agence, déi op Portraite vun Auteure spezialiséiert war, huet de Philippe Matsas de John Foley kennegeléiert an huet ugefaange fir déi grouss Agence Opale ze schaffen. Sou huet de Philippe Matsas fir säi Beruff wichteg Leit kenne geléiert an ass an dëse Milieu erakomm.

De Fotograf zerécksetzen

E Mënsch ze fotograféiere wär e ganz perséinlecht Zesummekommen, dat vill Sensibilitéit erfuerdert. Et misst ee sech als Fotograf zerécksetzen an de Sujet no fir bréngen. Et misst een e Lien opbauen, an et dierft ee keng Viruerteeler hunn, erkläert de Philippe Matsas.

"Jiddereen huet seng eege Virstellung vu sech selwer." Donieft géif et dat Bild, wat ee wéilt vu sech ginn, deen Androck, deen ee géif maachen, an dat, wat een effektiv wier. Déi véier Punkte géifen heiansdo ganz wäit ausernee leien. Domat misst een als Fotograf eens ginn.

Relatioun zum Houellebecq

Eng ganz besonnesch Relatioun huet hie mam Enfant terrible vun der franséischer Literatur. De Michel Houellebecq hätt hien duerch Zoufall kennegeléiert. No deenen éischte Portraiten, déi hie vum Schrëftsteller realiséiert hat, huet hien de Philippe Matsas ëmmer nees engagéiert.

Wann Iech demnächst den Iggy Pop ganz expressiv vun enger Foto eraus entgéint kuckt, da luusst emol, ob sech hannert dësem Portrait net den Numm Philippe Matsas verstoppt.