D'Story demarréiert um Dag vun der Inauguratioun vum fréieren US-President Barack Obama.
Et ass d'Geschicht vun engem Superräichen, dem Nero Golden. Hien ass mat sengen dräi Jongen aus engem asiatesche Land a sengen Terrorattentater geflücht. Hie sicht fir seng Famill an Amerika d'Garantie vum Iwwerliewen a besser Perspektiven.
Dëst sinn net déi typesch Refugiéen: si installéiere sech an engem schicke Quartier vu Manhattan, déi dräi Filiussen hunn als Spëtznimm d'Nimm vu réimesche Keeseren, an d'Famill ënnerhält sech gär emol op Latäin.
Eng amerikanesch Geschicht
Et ass och d'Geschicht vun enger russescher Schéinheet, déi an Amerika hire Genen eng Zukunft wëllt ginn. An et ass d'Geschicht vun der Erzielerfigur, engem Fils vu belschen Awanderer, deen eigentlech nëmmen Observateur wollt sinn an awer eng zentral Roll am Plot spillt.
Et ass eng amerikanesch Geschicht - all Haapt-Protagoniste sinn Immigranten. An am Hannergrond turnt d'Figur vum Joker - ee wéi aus dem Batman-Comic - e Personnage mat gréngen Hoer, rout gefierfte Lëpsen an den onwahrscheinlechste Spréch. Hien deklaréiert iergendwann seng Kandidatur fir d'Presidence vun den USA. Den Joker bleift eng Randfigur, mee ass bestëmmend fir de Klima, deen hei beschriwwe gëtt.
D'Schicksal als zentraalt Thema
A wéi an all Roman vum Rushdie geet et och hei ëm säin zentraalt Thema: d'Schicksal - wéi et sech imposéiert, a wéi e Protagonist duerch dat, wat e mécht oder net mécht, d'Zukunft beaflosst.
D'Romaner vum Salman Rushdie sinn heiansdo Freedefeiere vu schillernde Figure mat villen Erzielsträng, déi mat zimlecher Urgewalt dohierkommen. Dat hält sech hei a Grenzen. "The Golden House" ass eng fléissend erzielte Geschicht, iwwerschaubar an novollzéibar, mat ville Bijouen an der Formuléierung.
Elementare Rushdie, eben. Net säitelaang Beschreiwunge vu Séilenzoustänn, mee eng gutt Geschicht, eng Freed ze liesen. Mat esouguer eppes, wat wéi en Happy End ausgesäit. "Give me a copper penny and I will tell you a golden story", steet am Epigraph vum Buch.