National Muséeën Wat akafen an Zäite vu knappe Budgeten?

Déi zweet Luxembourg Artweek leeft den néngte November un, déi verschidde privat Sammler dierften hir Akaafslëschte scho prett halen. Wéi gesäit et mat den Acquisitioune bei de Stater Muséeën aus? Virun e puer Joer gouf hire Budget staark reduzéiert wann en net an aner Budgeten, wéi zum Beispill d’Fonctionnementskäschten, iwwergaangen ass. Fir déi Responsabel vun de Musées-Kollektiounen en Desaster.

Kerstin Thalau, md

Riicht Eraus RER Villa Vauban Kollektiounen.JPG
Christian Mosar, Kerstin Thalau, Danièle Wagener a Malgorzata Nowara

D’Sammlung vun der Villa Vauban baséiert op den Done vun dräi Privatsammlungen: déi vum Jean-Pierre Pescatore, vum Leo Lippmann an déi vun der Eugénie Dutreux-Pescatore. Bis haut ass d’Sammlung op iwwert 2.500 Wierker ugewuess, bei 2.000 handelt et sech ëm lëtzebuergesch Konscht.

Am Musée national d'histoire et d'art (MNHA) ass dat eelst eegent Konschtwierk aus dem 13., dat jéngst aus dem 21. Joerhonnert. 10.000 Wierker sinn eleng an der Beaux-Art-Sektioun ze fannen, dovunner 4.000 lëtzebuergesch Wierker.

Iwwerschneidunge bei de Sammlunge problematesch

Fir d’Danièle Wagener, Directrice vun den zwee Stater Muséeën, ass et wichteg, sech mat der Equipe vum Nationalmusée iwwer Lëtzebuerger Konscht ofzeschwätzen. Et géif drëms goen, zesumme complementaire an eenzel komplett ze sinn .“Op kee Fall wëlle mir d’Präisser an d’Luucht dreiwen, doduerch, datt mir eis zu zwee fir ee Wierk intresséieren”, sou d’Directrice vun der Villa Vauban am Gespréich mam Kerstin Thalau a mam Christian Mosar.

D’Malgorzata Nowara, Conservatrice vun der Beaux-Arts-Sectioun vum Nationalmusée, schafft fir thematesch Ausstellungen iwwer Lëtzebuerger Konscht dacks mat der Stad Lëtzebuerg zesummen. Sief et fir d’Ausstellung iwwert de Jean Schaack, de Joseph Probst oder den Théo Kerg. “Do kann et also scho guer net zu engem double-emploi kommen. Et geet drëms, Loscht op eis zwou Institutiounen ze maachen”.

D’Conservatrice ass iwwerzeegt, datt den MNHA verschidde Flichten z'erfëllen huet. “Wien an en Nationalmusée era geet, wëllt national Konscht gesinn, respektiv kenneléieren“. Dofir hätt ee viru kuerzem verschidde grouss Nimm, wéi de Michel Majerus, akaf. “Wann deen nämlech net a mengem Musée hänkt, hunn ech fir d’Leit vu bausse meng Aarbecht schlecht gemaach!”

Tous mécènes d’un Koekkoek

Bis den éischte November hat de grousse Public d’Méiglechkeet, dem MNHA Sue fir en original Barend Cornelius Koekkoekk aus dem 19. Joerhonnert ze spenden. Den talentéiertsten hollänneschen Landschaftsmoler hat deemools am Optrag vum Wëllem ll. Groussformateg Lëtzebuerger Landschafte gemoolt. Wéi den héich verschëlte Souverän gestuerwen ass, waren der aacht fäerdeg, eent ass verbrannt, dräi sinn der verschwonnen. Véier Wierker sinn a Privatbesëtz.

Den MNHA krut d’Aarbecht mat der Ruin vun der Fiels fir e Frëndschaftspräis ugebueden: de Proprietaire war der Meenung, d’Wierk géif an den Nationalmusée gehéieren. An awer goung den Acquisitiounsbudget dofir net duer - de Rekordpräis fir e Koekkoek läit bei 1,4 Milliounen Euro. “De Crowdfunding war och geduecht, fir de Lëtzebuerger Public ze sensibiliséieren an dat huet tatsächlech wonnerbar fonktionnéiert!”, sou d’Malgorzata Nowara.

Wien Acquisitioun seet, muss och Conservatioun bedenken

Zënter 2009 huet den Nationalmusée en Depot ausser Haus, equipéiert mat der neister Technik, wou professionell Restaurateuren an ideale Konditioune schaffe kënnen, dacks esouguer präventiv. Eng Kollektioun accessibel maachen, bedeit fir den Nationalmusée och, eng Hellewull Prêten erausginn. An dat ass mat Aarbecht verbonnen. Och d’Equipe vun der Villa Vauban interesséiert sech fir nei Methode vun der Conservatioun a fir d'Entwécklung vu Systemer, déi et erlaben, Plaz ze spueren.

Béid Haiser fäerten och net, an Zukunft vu komplette Wierkbestänn vu Lëtzebuerger Kënschtler iwwerlaf ze ginn. “Mir hunn nach keng Problemer, eis Donen ze geréieren”, sou d’Danièle Wagener. “Allerdéngs kann een och net all Don unhuelen. Dat ass fir d’Leit schwiereg z'akzeptéieren, wat ech definitiv novollzéie kann. Mee eis geet et an éischter Instanz ëmmer ëm d’Pertinenz vum Wierk fir eis Sammlung”.

Reelle finanzielle Wäert vu Lëtzebuerger Konscht gefall

Fir d’Danièle Wagener ass et evident, datt fir d’Lëtzebuerger bei lëtzebuergescher Konscht den emotionale Wäert méi zielt ewéi de finanziellen. Mee dat wier an deene meeschte Länner esou. “De Geldwäert um Marché spillt fir den MNHA eng ënnergeuerdent Roll”, confirméiert och d’Malgorzata Nowara, “De Präis fir e Kënschtler erlieft a senger Carrière Héichten an Déiften. Dat huet net ëmmer eppes ze soen. Mir sammele Konschtgeschicht, dat wat konschthistoresch relevant ass.”

A wa vun uewen e Kollektiouns-Stopp kéim? “Eis Missioun ass et, eng Sammlung opzebauen, e Stopp kënnt net a Fro!”, sot d’Malgorzata Nowara. An och d’Danièle Wagener huet ënnerstrach, datt eng Sammlung sech weiderentwéckele muss. Fir d’Villa Vauban wiere souwisou net dacks Saachen um Marché. A wann dat de Fall wier, da misste si reagéiere kënnen. Et géif keen zéng Joer drop waarden, datt de Portemonni vun engem Konschtmusée sech nees fëllt.

An der Mediathéik:

Riicht eraus / / Kerstin Thalau
Lauschteren

Méi zum Thema

Mudam - Walking Through
Zäitgenëssesch Konscht

620 Wierker sinn haut an der Sammlung vum Mudam - a si wiisst weider, trotz Budgetskierzungen. Mee wourop kënnt et bei esou enger Kollektioun un a firwat ass si gutt? Eng Bestandsopnam.

Albrecht Bouts
Konscht

2009 hunn d'Schwëstere vun der Sainte-Sophie e wichtegen Tableau vun engem flammännesche Moler fonnt. Doduerch koum déi aktuell Albrecht-Bouts-Expositioun am Nationalmusée zustan.

Christian Mosar
Internationale Muséesdag

D'Lëtzebuerger Muséeën hu Succès, nodeems Ufanks den 2000er Joere villes geännert gouf. Et stellt sech awer d'Fro wien an de Musée kënnt a virun allem firwat, seet de Konschtexpert Christian Mosar.

Net verpassen

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen