United Instruments of Lucilin 33,7 Stonnen Nei Musek...
Fir esou e Projet ze realiséieren misst ee "gebass", vläicht och e bësse verréckt sinn, seet d'Braatschistin Danielle Hennicot. Nächste Weekend, de 17. an 18. September proposéiert den Ensembel United Instruments of Lucilin e Festival an der Kulturfabrick zu Esch, bei deem 2022 Minutten - ëmgerechent 33,7 Stonne - Musek um Programm stinn. Dëse Projet am Kader vun Esch2022 kann een zum Deel och um radio 100,7 suivéieren. Den Nuetsprogramm ass nämlech vun dräi bis siwen Auer op eiser Antenn ze héieren.
Virun dräi Méint hätt déi intensiv Phas vun der Virbereedung ugefaangen, seet d'Danielle Hennicot. Niewent dem raussiche vun de Stécker hätt och d'Astudéiere vun de Partituren e groussen Opwand bedeit. Eng vun den Iddien hanner dësem Gratis-Festival wier et, déi ganz Diversitéit vun der Neier Musek duerzestellen, seet d'Florence Martin, d'Co-Directrice vum Ensembel.
"Et ass esou, wéi mer et dachs am Laf vun enger ganzer Saison maachen, just hei eben an engem Weekend."
Diversitéit am Mëttelpunkt
Dës Diversitéit a Form vu kuerzen Opféierungen, Concerten, Instalatiounen, engem Baal a Filmer soll dem Publikum en Zougang zu der neier Musek schafen. Deementspriechend gëtt vun den Nolauschter:innen och net erwaart, datt si déi ganz 33,7 Stonne bleiwen. Dozou d'Danielle Hennicot:
"Et soll ee kommen a sech dovun e Bild maachen. Et kann een era kommen a probéieren."
Fir d'Zesummestellung vum Programm huet sech Lucilin un der Populatioun vu Regioun ronderëm Esch orientéiert. Dofir huet den Ensembel d'Statistiken ënnersicht a gekuckt, wéi dës Populatioun zesummegestallt ass. D'Prozentzuele vun den Nationalitéiten, der Geschlechterverdeelung an dem Alter huet den Ensembel dunn a Minutten ëmgerechent an ass uschléissend op d'Sich no Stécker vu passende Komponist:inne gaangen."Esou maache mer wierklech eng Cartographie vun der Populatioun, a mer hoffen, datt jiddwereen e Stéck vu sech selwer doran erëmfënnt", seet d'Florence Martin.
Lauschtert dee ganzen Interview hei
E Bléck hanner d'Kulissen
33,7 Minutte Musek um Stéck bedeiten Méint un Aarbecht. Fir en Androck dovun ze kréien, wat alles hannert esou engem Projet stécht, hat de Luc Boentges e Rendez-vous mam Ensembel Lucilin am Carré zu Holleresch, dem aktuelle Sëtz vu Lucilin.
Méi zum Thema
Lëtzebuergesch Kläng am Stephansdoum
E Sonndeg (11.09) séngt d'Maîtrise net wéi gewinnt an der Kathedral, mee am Stephansdoum zu Wien. Déi Lëtzebuerger Sänger:innen encadréieren d'Mass mat enger Kompositioun vum Laurent Menager.
De Lëtzebuerger Cellist Benjamin Kruithof wënnt den éischte Präis
Gëschter Owend (8.9.2022) war d'Finale vum Cellosconcours beim internationale Georges-Enescu-Concours zu Bukarest. Dräi Museker stoungen an der Finale. Um Enn setzt sech de Lëtzebuerger Cellist Benjamin Kruithof duerch.
