Antëschent ass och Lëtzebuerg vum Bach-Virus ugestach, an de radio 100,7 war dëst Joer Deel vu Bach in the Subways. Fir dem Johann Sebastian Bach säin 334. Gebuertsdag ze feiere spillt d'Anne Clement dräi Stécker vum Komponist op der Blockflütt an och der Viola da Gamba.
Dat éischt Stéck ass en Extrait aus der Partita BWV 997.
Iwwer Musek, déi ronn 300 Joer al ass, gëtt vill spekuléiert. Wéi geet ee beim Astudéieren vun esou ale Stécker vir? Wat soen engem d'Quellen? D'Anne Clement gëtt en Abléck.
De Rosch Mirkes vum Ensembel Ad Libitum ass ee vun den Organisateure vu Bach in the Subways zu Lëtzebuerg an ass och selwer musikalesch bedeelegt. Am Gespréich mam Guy Engels schwätzt hien ënner anerem iwwer seng Andréck vum Dag, d'Problemer an der Perceptioun vum Bach senger Musek an ob dem Bach seng Musek iwwerhaapt nach muss promovéiert ginn.
Zweeten Organisateur vu Bach in the Subways zu Lëtzebuerg ass d'INECC, den Institut Européen de Chant Choral. Do dernieft ass d'INECC och aktiv mat engem Bach-Quartett an engem Bach-Chouer involvéiert. D'Elisa Baiocchi verréit, wéi dës Offer ukomm ass, a wéi et an Zukunft mat Bach in the Subways virugeet.
Als Ofschloss huet d'Anne Clement e weidert Stéck vum Johann Sebastian live interpretéiert. Dës Kéier allerdéngs op hirer Viola da Gamba.