Klassik-CD vun der Woch Confluences
Kann ee Mann e ganzen Orchester ersetzen? Den Organist Maurice Clement huet fir säin neien Disk Wierker aus der grousser romantescher Orchestermusek arrangéiert a mat vill Gefill agespillt.
CD: Confluences
Label: Aeolus
Interpret: Maurice Clement
Wierker:
- Richard Wagner: Vorspiel zu "Tristan und Isolde"
- César Franck: Fantaisie en la
- Samuel Rousseau: Fantaisie pour orgue, op. 73
- Anton Bruckner: Symphonie Nr. 7 - Adagio
- Franz Liszt: Am Grabe Richard Wagners
- Franz Liszt: Funérailles
| Interpretatioun: |  |
| Klangqualitéit: |  |
Confluences - et geet ëm den Afloss vum Richard Wagner op aner Komponisten a Wierker. Dat éischt Stéck um Programm ass d'Virspill zu der Oper "Tristan und Isolde", eng Kompositioun déi d'Museksgeschicht wéi kaum eng aner beaflosst huet. Et ass en Orchesterwierk, dat nieft der Harmonik virun allem duerch seng raffinéiert Instrumentéierung a säi groussen dynameschen Opbau ervirstécht. Um Disk fënnt een dëst Virspill an engem Arrangement vum Maurice Clement, an deem hien dës Charakteristiken ervirbréngt. Dat selwecht gëllt fir d'Stéck am Mëttelpunkt vum Programm: den Adagio aus der siwenter Sinfonie vum Anton Bruckner.
Eng nei Uergel
Opgeholl gouf "Confluences" op der neier Uergel an der Dekanatskierch zu Dikrech. Mat sengen iwwer 3.000 Päifen a sengen 51 Regëster erlaabt d'Instrument dem Maurice Clement et, d'Feinheete vun der romantescher Instrumentatioun op der Uergel ze realiséieren. Duerch de permanente Wiessel vu Klangfaarwe geléngt et dem Organist, déi grouss Entwécklungen an de Stécker lues a lues bis zu groussen Héichpunkten opzebauen. Gekoppelt mam Drock, deen d'Uergel an den déiwen Noute produzéiert, beandrocken dës Passagen deelweis méi, wéi wann en Orchester se spillt.
En Zesummespill vu Klang an Interpretatioun
Dofir, datt dës Héichpunkten och um CD eriwwer kommen, suergt d'Klangqualitéit vun der Opnam. Weder huet een d'Gefill an der Mëtt vun der Uergel ze setzen, nach ze wäit ewech ze sinn. Och d'Präsenz vum Nohall ass perfekt doséiert: E gëtt der Uergel Volume, ouni datt d'Téin verschwammen. An dësen Nohall setzt de Maurice Clement ganz bewosst an. Besonnesch beim Franz Liszt sengem "Am Grabe Richard Wagners" fält op, datt hien deen als Phraséierungsmëttel notzt.
E grousse Bou
Deen eenzege Schwaachpunkt vun dësem Disk läit an der Natur vun den Arrangementer. Doduercher, datt een op der Uergel e ganzen Orchester ersetzt ass et onméiglech alleguerten d'Feinheeten ze realiséieren. Besonnesch bei esou bekannte Stécker wéi zum Beispill dem Virspill zu "Tristan und Isolde" fält dat op. Allerdéngs gëtt dat duerch de grousse musikalesch Bou, deen de Maurice Clement iwwer d'Stécker spaant zum Deel nees kompenséiert.
Méi zum Thema
Déi nei Saison an der Philharmonie
De radio 100,7 war bei der Programmvirstellung dobäi, huet mam Direkter Stephan Gehmacher iwwer déi nei Saison geschwat an huet e Bléck hannert d'Kulisse vun der Philharmonie geworf.
Caroline Goulding - Korngold & Mozart
De Mozart an de Korngold waren a ganz Europa als Wonnerkanner bekannt. D'Interpretatioun vun der jonker Geiistin Caroline Goulding iwwerzeegt duerch e liewegt, frëscht a faarwegt Spill.
De würdegen Ofschloss vun enger Intégrale
De Marcus Bosch an d'Staatsphilharmonie Nürnberg schléissen hir Dvořák-Intégrale mat der zweeter Sinfonie vum tschechesche Komponist of. Eng Opnam, déi an allen Aspekter iwwerzeegt.
Strauss, en Held vum Cello?
De Richard Strauss huet net vill fir Cello geschriwwen. Awer d'Wierker op dësem CD gehéieren zu deene beschten aus dem Repertoire fir dëst Instrument, fënnt déi bekannten Cellistin Ophélie Gaillard.
