Musikaleschen Nowuess Déi aacht Acts um Screaming Fields 2019

E Samschdeg den 13. Juli trieden Newcomer aus der Lëtzebuerger Pop- a Rockzeen an der Rockhal op. Wie verstoppt sech hanner den aacht Nimm? Mir stelle se vir.

Jamie Reinert / cbi

Screaming-Fields
Foto: Noah Fohl

Francis of Delirium

"Meng éischt EP hunn ech selwer a mengem Schlofzëmmer opgeholl". Déi 17 Joer al Musekerin setzt op eng DIY Ästhetik. "Et ass nëtzlech autonom ze si punkto Produktioun. An deem Beräich wëll ech mech an Zukunft definitiv méi eraschaffen". Am Moment wier si nach am Gaangen hiren eegene Sound ze entdecken, Rock orientéiert, awer sécherlech net dorop limitéiert.

Lauschteren


Epicure.

"Mir hunn an der Lescht e grousse Sprong no vir gemaach". D'Band ass elo zu sechs an de fréiere Batteur ass op Synthi gewiesselt. Elo wiere méi Klang-Méiglechkeeten do. "All Prouf hu mir quasi en neit Lidd oder eng nei Iddi". Jiddwereen hätt seng eegen Aflëss, déi an de Projet fléissen. An Zukunft freeë si sech elektronesch Sounds nach méi anzebannen.

Lauschteren


Hannah Ida

"Ech schreiwen haaptsächlech iwwer dat, wat mech ëmgëtt a mengem alldeegleche Liewen". De Prozess vum Lidderschreiwe wier fir d'Musekerin zimlech natierlech gewiescht. "Musek war déi Konschtform, déi ech ëmmer gesicht hunn". Mat hirer akustescher Musek wéilt si d'Leit zum Nodenke bréngen. "Zur Rou kommen an enger chaotescher Welt, dat fannen ech schéin."

Lauschteren


Parity

"Mir maache moderne Metal, eng Mëschung vu ville Metalzorten". D'Band aus dem Süden ass op der Sich no hirem eegene Sound. "Dat Raut aus dem Süde kéint en Afloss duerstellen". D'Formatioun ass vun enger Sängerin déi screamt gefront. Domat géif sech eppes Neies hei am Land etabléieren. "Beim Opriichte gëtt ee vläicht als Fra, déi screamt, e bësse belächelt". Nom Soundcheck géifen awer déi ganz haart Männer dann awer och op eemol grouss kucken.

Lauschteren


Christina Kalyss

"Et war zimlech natierlech fir mech meng Musek mat aneren ze deelen". Déi 22 Joer al Sängerin huet kierzlech hir éischt EP erausbruecht. "Ech wëll och esou séier wéi méiglech meng Musek am Ausland presentéieren". Si wier ganz oppe fir mat anere Museker ze collaboréieren an als R'n'B Sängerin zu Lëtzebuerg géif si all jonk Meedercher, déi dat hei och wëlle maachen, absolut encouragéieren.

Lauschteren


Drife

"Britesch Rockmusek vun Enn den 80er bis an d'2000er si fir eis eng staark Referenz". D'Band aus dem Norde steet zu siwen op der Bühn an ass vum Alter hir breetgefächert. Ufanks stounge Coveren um Programm, mee déi lescht 12 Méint hätt sech de Grupp vum Songwriting hir staark entwéckelt. "D'Prioritéit ass Spaass un der Musek an d'Passioun, déi mir deelen".

Lauschteren


ÆM

D'ÆM ass am elektroneschen Dream-Pop doheem. D'lescht Joer huet d'Musekerin de Song Contest um Screaming Fields Festival gewonnen. "Dëst Joer hunn ech geduecht ech kéint um Festival meng Live-Performance verbesseren." Ze gewanne wier fir si keng direkt Prioritéit. "Den Event erlaabt mir an éischter Linn ze léieren a mech weiderzëentwéckelen." An hirem Liewe wéilt si einfach nëmme Musek maachen.

Lauschteren


Lara Grogan

"Zanter véier Joer schreiwen ech Popmusek". Am Ufank wier d'Musek éischter en Hobby gewiescht. Mat 13 war d'Musekerin am Screaming Fields Song Contest an den Top 5. "Dunn hunn ech geduecht, wann ech schonn esouwäit komm sinn, da kéint ech dat e bësse méi seriö maachen". D'Beatles wieren de Grond, firwat si ugefaangen huet Lidder ze schreiwen.

Lauschteren

Méi zum Thema

Ryvage
Ryvage presentéiert Tides EP

De Lëtzebuerger Produzent Ryvage schléit mat sengem Synthesizer-lastegen Electropop Wellen. Dëse Freideg presentéiert hie säin éischten EP. Et geet ëm Sujete wéi Gediechtnes, Zäit an Identitéit.

Napoleon Gold
Sunset Motel

"Sunset Motel" wäert dem Napoleon Gold seng nei Plack heeschen, déi am Hierscht erauskënnt. De Sunset Motel, dat ass déi imaginär Plaz, an déi sech de Museker zeréckzéie geet, wann d'Aen erëm eng Kéier net zoufale wëllen.

The Disliked am Studio
Nei Scheif vun The Disliked

Den 31. Mee presentéieren The Disliked hiren neien Album "Reggae Rescue". Am Gespréich erklären d'Museker, firwat si e Gang zeréckgeschalt hunn. A si spillen zwee nei Stécker am Studio.

Nicool-By-Alphonse-Hatz
Debut Album vu Lëtzebuerger Rapperin

Rap ass zu Lëtzebuerg nach ëmmer eng Chasse gardée vun de Männer. D'Nicool kënnt, fir dat ze änneren. De 7. Juni presentéiert déi jonk Rapperin hiren Debutalbum "Den Ufank vum N".

Dossieren

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

  • Literaturfestival "étonnants voyageurs"

    Iwwer de Päischtweekend stoung d'Literatur aus der ganzer Welt, awer och de Film an d'Ausstellungen am Mëttelpunkt an der klenger bretonescher Festungsstiedche Saint Malo.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen