One True Pairing - One True Pairing E Soundtrack fir schwiereg Zäiten

A schwieregen Zäiten entsteet dacks gutt Musek. E Beispill dofir ass den éischte Soloalbum vum britesche Sänger a Museker Tom Fleming. Hien huet als "One True Pairing" en Album mam selwechten Titel erausbruecht.

Yves Stephany / cbi

One True Pairing
Foto: Jenna Foxton

Nee, et ass net 1984, mee 2019. A mir lauschteren net de Bruce Springsteen, mee den Tom Fleming. D'Baritonstëmm bei der britescher Indie rock Band Wild Beasts, déi am Februar 2018 hire leschte Concert gespillt haten.

Et stiechen effektiv vill Referenzen dran, am One True Pairing Album. Bruce Springsteen an Depeche Mode si wahrscheinlech déi Nimm, déi engem als éischt an de Kapp kommen. Awer One True Pairing ass trotz retro Sound eng top aktuell Scheif.

Autobiographesch Momenter alternéieren a verschmëlze mam Frust an der Perspektivlosegkeet vun engem groussen Deel vun der britescher Populatioun. Perséinlech an tëschemënschlech Gefiller kommen op een Nenner mat Kritik u Gesellschaft a Politik. Alles dat geléngt dem Tom Fleming ouni arty farty Hipstertum, mee mat guddem handgemaachte Rock.

E selwergemaachten Album

"Ech wollt iwwer déi richteg Welt schreiwen", seet den Tom Fleming an engem Schreiwe vum Label Domino. Hien hätt kee geschmackvollen, artisteschen Disk wéilte maachen. Awer genee dat ass him reusséiert.

Hie goung eleng an de Studio, mat engem Notizbuch voller Demoen, déi hie mat der akustescher Gittar an e Mikro gebläert hat. Hanner zouenen Dieren huet hie säi Frust mam Produzent Ben Hillier Kanaliséiert. Datt deen och scho Saache vun Depeche Mode, Suede, Blur a souguer U2 produzéiert huet, mécht Sënn.

Trotzdeem ass et en DIY Album. Ouni grouss Gäscht, mee mat enger elektronescher Approche, mat Gebastels an Overdubs, a mat ville Synthesizeren, déi mam Tom Fleming senge Gittare ringen.

Et kann ee sech mat him identifizéieren

Et kann ee schmunzelen oder souguer laachen iwwer One True Pairing. Datt een 2019 sou eng Musek mécht, kann een als gewot bezeechnen. Awer ech fannen et erfrëschend. Virun allem gefält mir, datt ee Museker sech traut en Album ze maachen, dee konsequent männlech ass.

Net machistesch, wéi dat momentan zum Beispill am Hip Hop ugesot ass. Ganz am Contraire - hei hu mir et mat engem Mann ze doen, dee leit, dee sech net zurecht fënnt an der Welt, dee vulnerabel ass a verletzt gouf. E Mann, mat deem vill sech kënnen op déi eng oder aner Manéier identifizéieren.

Virun allem awer och e Mann mat enger enormer Stëmm, wéi et se nëmmen eng Kéier gëtt. An ech sinn immens dankbar, datt déi Stëmm sech emanzipéiert huet, a sech traut, fir ouni dem Hayden Thorpe (deem anere Wild Beasts Sänger) säi Falsetto weider ze sangen.


An der Mediathéik:

Album vun der Woch / / Yves Stephany
Lauschteren

Méi zum Thema

Rocko Schamoni
Rocko Schamoni - Musik für Jugendliche

Musik für Jugendliche ass en Album vun engem Mann, deen ouni mam Aen ze zwinkeren zougëtt, datt hien nostalgesch Tendenzen huet a gären do hänke bleiwe géif, mee dee gläichzäiteg sech a seng Musek domat och no vir bréngt.

Adam Green
Adam Green - Engine of Paradise

"Engine of Paradise" ass eng kuerz, intelligent, humorvoll an zudéifst réierend Kollektioun vu Lidder, bei där den Adam Green seng Konscht net nei erfënnt. An dat ass och gutt esou.

Programm

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • CinÉast 2019

    Et ass déi zwieleften Editioun vum CinÉast Filmfestival. Vum 3. bis den 20. Oktober ginn iwwer 65 Featuren a 50 Kuerzfilmer aus 20 Länner aus Mëttel- an Osteuropa gewisen.

Net verpassen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen