Princess Century - s u r r e n d e r En eklekteschen Trip duerch d'Sphäre vun der Léift

"Si ass dat Museksinstrument, wat jidder Mënsch ouni d'Hëllef vun engem aneren, ouni Reegelen a Prinzippie benotze kann", sou den Denis Diderot iwwer déi mënschlech Stëmm. Mee wie vun eis erënnert sech net un dee wackelege Moment, wou ee seng eege Stëmm fir d'alleréischte Kéier als Opnam héieren huet. Sou muss et och der Produzentin an Drummerin Maya Postepski gaange sinn, déi lo op hirem drëtte Solo-Album fir d'éischte Kéier och selwer séngt.

Vicky Stoll / cbi

Princess Century

Friem a plakeg huet sech d'Maya Postepski gefillt, wéi se hir Stëmm am Studio héieren huet. Déi kanadesch Musekerin kennt een éischter als Batteuse vun der Elektropop-Band Austra oder als Partnerin vum Robert Alfons beim Elektro-Duo TR/ST.

Ënner dem Pseudonym "Princess Century" huet si lo hiren drëtten Disk "s u r r e n d e r" erausbruecht. Dat englescht Verb "surrender" gëtt an hiren Aen dacks falsch verstanen. Fir si bezeechent et net einfach d'"Opginn", mee et huet eng méi sënnlech, deels schonn erotesch Konnotatioun. Am Sënn vun "sech opmaachen" an "Neies zouloossen".

En introspektiven Album

Den Titel vum Disk "s u r r e n d e r" schreift sech mat jeeweils engem Espace tëschent all Buschtaf. Dës Typographie soll enschleunegend wierken a Rou ausstralen. Den Album ass laut der Kënschtlerin immens introspektiv, an refletéiert de Gefillstrip, deen d'Maya Postepski alias "Princess Century" besonnesch wärend dem Lockdown ugedriwwen huet.

Virun allem d'Léift steet hei am Mëttelpunkt an ass déi dreiwend Kraaft hanner all eisen Aktiounen. An heiansdo bleift engem näischt Aneres iwwreg, wéi driwwer ze laachen - dovun erzielt zum Beispill den Track "Stupid Things".

Ganz erfrëschend ass, datt d'"Princess Century" eis op hirem Disk eemol queesch mat duerch d'Geschicht vum Elektro schleeft. Um extreem eklekteschen Album héiert ee ganz vill subtil a manner subtil Referenzen, ënner anerem eng mesmeresch Hommage un de Steve Reich a seng Minimal Music. Dee méi provokativen an hypnoteschen Track "Touch Yourself" ass dogéint ee Wénk a Richtung Detroit House.

Mir befannen eis an engem dreemeresche Zenario mat engem ganz primitiven dreiwende Beat. Op eemol awer gi mer vu Roboteren an Aliens dozou opgefuerdert, eis ze beréieren. Sou d'Maya Postepski iwwer d'Iddi hannert dësem Song.

Eng Fantasiewelt

Sou villfälteg déi verschidde Stécker um Album och sinn, ni fillt ee sech beim Lauschtere verluer. Villméi gëtt een duerch déi knackeg, mee waarm Produktioun an déi verschleiert an verniwwelt Fantasiewelt eragezunn, vun där d'Maya Postepski schwäermt, wa si iwwert déi eenzel Tracks schwätzt.

Esou stellt sech also beim Lauschteren eng Himmelfaart duerch d'Musek, d'Zäit an déi verschidde Facettë vun Erotik a Léift an. E genee sou doucen, wéi och progressiven an energetesch-enthusiasteschen Album, deen eis Princess Century do ofgeliwwert huet.


An der Mediathéik:

Album vun der Woch / / Vicky Stoll
Lauschteren

Méi zum Thema

SUUNS
Musek

Zentral fir d'Roll vun engem Zeien ass säi Bléck. "The Witness", déi nei a fënneft Studioplack vun der kanadescher Band Suuns ass een Album iwwer Blécker, Gewëssensfroen a Selbstzweiwel.

Nina on horse by Louis Decamps.jpg
Nina Savary

An hirer Bergerie an de Corbières, wäit ewech vun allem, huet d'Nina Savary hir Dreem, Fantasien a soss komesch Visiounen a Musek gewandelt. Erauskomm ass mat "Next Level Soap Opera" ass en exzentrescht an eegewëllegt Pop-Wierk.

 

Net verpassen

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen