Um Eurosonic gesäit een net vill Leit op de Concerten danzen. Déi meescht Spectateure sinn do fir ze schaffen a kucken a lauschtere genee, wat gebuede gëtt a lafen no zwee Lidder op den nächste Concert. Den Oskar Strajn ass ee vun den zwee Bookeren, déi d'Programmatioun zesummestellen. Hien beschreift de Eurosonic als eng Plattform fir Museker, déi bereet si fir duerch Europa ze touren. D'Kënschtler missten nieft hirem Talent weisen, datt si wësse wat den nächste Schratt ass. "An den Eurosonic ass ee vun deene Schrëtt fir un d'Zil ze kommen", sou den Oskar.
Jonk Musekerinnen a Museker, déi duerch Europa wëllen touren a vun hirer Musek liewen, där ginn et der vill. Et géif een all Joer ronn 5.000 Kandidaturen erakréien, an de leschten zwee Joer wieren et der souguer nach méi gewiescht.
Iwwer dem Oskar säi Büro ginn deemno och d'Kandidature vun de Lëtzebuerger Acts, déi um Festival wëllen optrieden. "Klein, déi dëst Joer gebucht goufen, sinn e ganz gutt Beispill fir eng Band, déi ganz originell ass, an déi eng Musek mécht, déi momentan am Trend ass. Si kombinéieren den Aspekt vum Jazz mat elektronescher Musek. Dat ass fir eis ganz intressant."
Niewent dem Trio Klein wäert och d'Indie Folk Band Seed To Tree Lëtzebuerg haut den Owend um Eurosonic vertrieden. Si goufe vum radio 100,7 invitéiert. Hire Sänger, de Georges Goerens, ass schonn e Mëttwoch op Groningen gefuer fir den Terrain ze preparéieren.
Hie wéilt sech awer net ze vill Drock maachen an einfach Leit op de Concert invitéieren déi hien um Festival begéint. Eng natierlech Aart a Weis géif ee méi wäit bréngen, wéi onperséinlech Emailen ze verschécken, seet de Georges.
Zu Groningen begéint een awer och e puer vun de wéinege Leit, déi zu Lëtzebuerg en Job am Musekssecteur hunn. Dat si virun allem d'Programmateure vun de Concertssäll. Wéi de Marc Scheer, deen zanter Kuerzem vu Coopérations zu Wolz an d'Escher Kulturfabrik gewiesselt ass. "Virun allem ass et interessant, well s de awer vläicht eng Grupp nach kanns buchen, éier se net méi ze kréien ass. Ech fannen et schonn immens spannend, an ech hu bis elo nach ëmmer all Joer déi eng oder aner Grupp gebucht."
De Freideg den Owend sinn d'Optrëtter vun de Lëtzebuerger Gruppe Seed To Tree, Klein hunn den Donneschdeg gespillt.