LIVE-MUSEK UM 100,7 Great Mountain Fire spillen Aircheck-Session

Dëse Samschdeg ass déi nächst Aircheck-Session an der Kulturfabrik. Dëse Concert gëtt, wéi gewinnt um 17 Auer hei um radio 100,7 iwwerdroen. Op der Affiche: déi belsch Pop-Formatioun Great Mountain Fire. Si hunn dëst Joer hiren drëtten Opus "Movements" erausbruecht. De Sänger a Frontmann Thomas de Hemptinne verréit, wéi Great Mountain Fire 2020 iwwerbréckt huet a wéi d'Release vum Album verlaf ass.

Philippe Hansen / tt

Aircheck mat Great Mountain Fire

Thomas de Hemptinne: 2020 war en eenzegaartegt Joer. Et war "merdique". Eigentlech wollte mir "Movements" am Mee erausbréngen. Mee dunn hu mir decidéiert fir ze waarden. A well den Album schonn am November 2019 gemastered gi war, a mir schonn un déi nächst Projete geduecht hunn, wollte mir net méi waarden. Dofir hu mir decidéiert fir en elo am November erauszebréngen.

Philippe Hansen: Dat hutt dir am Botanique zu Bréissel gemaach?

Jo, de Botanique huet eis proposéiert, datt mir den Datum géife bäibehalen, deen ofgemaach war, an datt mir e Live-Stream géife maachen. Fir eis war et eng grouss Freed fir kënnen ze spillen, a fir dat trotz allem mam Publikum kënnen ze deelen. Dës Period ass fir Museker ganz komesch, well ee seng Musek net méi "richteg" mam Publikum kann deelen. Mee mir si frou, datt mir den Album trotz allem konnten erausbréngen.

Kritt dir an der Belsch als Grupp oder als Kënschtler finanziell Hëllefen oder soss Ënnerstëtzung?

Et ginn effektiv Hëllefen, wann de Revenu vu Museker ënner engem bestëmmte Montant ass. Ech mengen dat läit ëm 1.000 Euro. Wann een do drënner läit, kritt een eng kleng Ënnerstëtzung. Et ginn do verschidden Acteuren, zum Beispill d'Sabam, déi d'Droits d'auteurs geréiert, Playright, déi d'Droits voisins geréiert an da ginn et nach aner Organisatiounen, déi kënnen hëllefen. Mir hunn net immens vill Demanden dofir agereecht. Mir hu just eng Hëllef fir d'Sortie vum Album ugefrot.

Looss eis iwwer är Musek schwätzen. Wéi ënnerscheet sech den neien Album vun deenen zwee éischten? Den zweeten Opus "Sundogs" war eng Grëtz méi experimentell a vläicht manner accessibel wéi "Movements"?

Fir den Album "Sundogs" hate mir eisen eegene Studio gebaut. Mir hunn eis eng limitéiert Zäit ginn, wou mir improviséiert hunn, wat zu méi experimentelle Resultater geféiert huet. Beim kreative Prozess vu "Movements" ware mir déi ganzen Zäit op Tournée. Mir haten also déi ganzen Zäit de Lien mam Publikum a konnten déi nei Stécker op de Büne spillen. De Feedback vum Publikum huet et eis erlaabt fir dat auszebalancéieren, wat mir wollte maachen. Dat ass de groussen Ënnerscheed zu deenen zwou éischte Placken. Deen hei Album hu mir scho gespillt, éier en opgeholl gouf.

Wann een ouni Publikum spillt, huet dat en Afloss op d'Energie oder de Rhythmus vun de Concerten?

Wa mir spillen, spille mir ëmmer zesummen. Dat ass d'Basis. Natierlech feelt eppes. Wann een dem Publikum eppes wéist, da geschitt eppes. Heiansdo gëtt een och enttäuscht, wann ee Méint laang ëmmer dat selwecht spillt. Momentan si mir einfach frou fir kënnen ze spillen. Ech hunn dat perséinlech net schlecht erlieft.


Great Mountain Fire spillen dëse Samschdeg, den 19. Dezember, eng Aircheck Session an der Kulturfabrik. De Concert gëtt live tëschent 17:00 an 18:00 hei um radio 100,7 diffuséiert.

Lauschtert de ganzen Interview:

An der Mediathéik:

Backstage / / Philippe Hansen
Lauschteren

Méi zum Thema

Aircheck Session - Heavy Patrol
The Last Barrel

E Samschdeg spillt déi Lëtzebuerger Blues Band Heavy Petrol an der Kulturfabrik. Ouni Publikum, duerfir geet de Concert hei um radio 100,7 live um 17.00 iwwer d'Antenn. E Gespréich mam Gittarist Steve Richer.

Aircheck Session vun Tuys
Concert

Fir trotz der Pandemie Concerte kënnen ze genéissen, huet de radio 100,7 zesumme mat der Kufa d'Aircheck Sessions an d'Liewe geruff. Den éischte Concert kënnt vun Tuys. Lauschtert hiren Optrëtt hei nach eng Kéier.

AIRCHECK Tuys
live Musek um 100,7

Fir kënne weider live Musek ze genéissen, lancéieren d'Kulturfabrik an de radio 100,7 d'Aircheck Sessions. Tuys maachen dëse Samschdeg um 17:00 den Optakt. De Concert ass eis Contributioun zum Eurosonic.

Programm

Net verpassen

Dossieren

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

  • Kuriositéiten aus der Lëtzebuerger Sprooch

    Si oder hatt? Zwee oder zwou? Domat oder domadder? Lëtzebuergesch ass och fir Mammesproochler net ëmmer einfach. Mir ginn der Saach op de Fong.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen