Ee vun de bekanntste Breaks, déi am Hip-Hop gesampelt goufen. Ënner Break versteet een hei en Deel vun engem Lidd, wou all Instrument aussetzt ausser d'Batterie.
"Sing A Simple Song" vu Sly & the Family Stone gouf op ganze 462 Lidder gesampelt. D'Lidd koum 1968 op hirem véierten Album "Stand!" eraus.
Den Album gëtt allgemeng als e kulturellen, historeschen an ästheetesche Meilesteen ugesinn. E war och e kommerziellen Erfolleg an huet sech zu méi wei dräi Milliounen Exemplare verkaf.
Ee Melting Pot
"Sly & the Family Stone" goufen 1966 zu San Francisco gegrënnt. Si spillen eng Mëschung vu Funk, Soul a psychedeleschem Rock. Sly Stone war de Singer/Songwriter a Bandleader. De Rescht vun der Band ware véier Geschwëster vun der Stone-Famill mat e puer Kolleegen zesummen.
Esou komesch dat och haut klénge kann, war et och déi éischt gréisser amerikanesch Formatioun, déi Männer a Frae vun verschiddener Hautfaarf an enger Grupp vereent huet. Op hirem Album "Stand!" ware si immens sozial kritesch, mee si bloufen awer ëmmer duerch hir Musikalitéit fir de breede Publikum accessibel.
Hir Aflëss sinn ze fanne bei James Brown, Motown, Stax a psychedeleschem Rock. Si mësche verzerrt Uergele mat wah-wah Gittare bis zu Gospel: fir dës Zäit war et e richtege Melting Pot.
All Funk-Musek, déi no hinnen erauskoum, gouf quasi vun hinne beaflosst, besonnesch de Sound vun Parliament a Funkadelic. Eng vun den Maxie vum Album war d'Lidd "Sing A Simple Song". De berüümte Break kennt bei der zweeter Minutt a 12 Sekonnen.
Eleng déi Perkussioun huet fir sech e ganzen Deel vun der Geschicht vum Hip-Hop geschriwwen. Wéi gesot bal fënnefhonnert Lidder sinn op Basis vun dësem Break entstanen. Dacks ass d'original Lidd net direkt erkennbar, well just de Sound vun der Snare oder der Kick geholl gouf.
Et geet vun Dr. Dre "Deep Cover", bis zu "Temptations" vum 2Pac, "Sound of Da Police" vum KRS ONE, DeLaSoul, Public Enemy, J Dilla, MC Solaar, Redman, EPMD, Pete Rock, Snoop Dogg, Das EFX, Ice-T, Jodeci, MOP, Kriss Kross, Common, Run DMC, Wu-Tang Clan, Digital Underground, Cypress Hill, Arrested Development, mee och Leit, déi net am Hip-Hop sinn, wéi Alanis Morissette oder souguer oder Spice Girls.
