Autorerechter Sampling no alle Reegele vun der Konscht

An Däitschland ass e Museksproduzent, deen e Sample vu Kraftwerk benotzt huet, duerch e Geriichtsuerteel entlaascht ginn. Feuilletoniste begréissen dat. Mä wat ännert konkret fir Museker?

Yves Stephany

Plackespiller viru Placken

Net just an Däitschland freeë sech d'Kommentatoren iwwert d'Uerteel vum Bundesverfassungsgericht. Sampling géif endlech als Konschtform unerkannt ginn. Karlsruhe huet eng Decisioun vum Bundesgerichtshof vun 2012 zeréckgewisen, déi d'Distributioun verbitt vum Sabrina Setlur-Song "Nur mir". De Produzent Moses Pelham hat am Lidd e Sample vu Kraftwerk benotzt. Den Elektro-Pionéier Ralf Hütter vun der bekannter däitscher Band Kraftwerk hat dowéinst géint de Produzent geklot.

Wéi geet et weider?

Dat géif net bedeiten, datt Museker elo sämtlech Samples kënne fräi benotzen, ouni dat virdru mat den Ayant droiten ze klären, erkläert de Marc Nickts vun der Sacem Lëtzebuerg. D'Uerteel ass nämlech nach net definitiv : Als nächst muss de Bundesgerichtshof nei tranchéieren. Duerno kéint de Fall virun den Europäesche Geriichtshaff goen.

Interessant ass, datt d'Verfassungsgericht spezifesch déi kuerz Durée vum Kraftwerk-Sample consideréiert huet. Ënner Museker gouf et zwar Rumeuren, datt Samples bis eng gewëss Längt, zum Beispill dräi Sekonnen, erlaabt wieren. De Marc Nickts seet awer, datt d'Längt vun engem Sample bis elo juristesch gesinn egal ass.

Rechtleche Kader erméiglecht Sampling

D'Technik vum Sampling ass zanter de spéide 70er Joren an der Pop-Musek wäit verbreet. Ëmmer nees koum et an deem Kontext och zu spektakuläre Geriichts-Prozesser. Meeschtens konnten d'Artiste mat den Ayant droiten en Accord fannen. "De rechtleche Kader gëtt déi Flexibilitéit fir dat ze negociéieren, fir datt jidderee ka Sampelen notzen, sou laang hie seng Rechter mat deene jeeweilege Leit kläert", seet de Marc Nickts.

Déi aktuell rechtlech Situatioun géif scho ganz vill erméiglechen. Grad, wann eng ganz Melodie oder e puer Täkt gesampled ginn. Allerdéngs wär e bessere gesetzleche Kader virun allem bei kuerze Samples sënnvoll. Et dierft awer schwéier ginn, fir eng Grenz ze definéieren.

Samples als Bausteng

"Ech klären definitiv net alles mat den Auteuren of, muss ech ganz éierlech zouginn", seet de Jacques Rasic. Hien ass Beatmaker bei Freshdax a schafft mat Artisten, wéi T the Boss. Heiansdo géif een e klenge Sound op enger Plack fannen an ophuelen. Dat kéint zum Beispill just een eenzele Trommel-Schlag sinn. "Du sammels all déi kleng Deelercher an engem Dossier. An zéng Joer duerno fënns du se nach eng Kéier erëm. An fann da mol raus, wou se hierkommen." Hie géif awer probéieren déi Problematik ze ëmgoen, andeems hie manner Samples benotzt.

An der Mediathéik:

Kultur / / Yves Stephany
Lauschteren

Méi zum Thema

Maka MC + BC ONE.JPG
Hip Hop

De Maka MC gesäit sech als musikaleschen Aktivist. Op sengem Debut-Album "Dialog" schreift de Lëtzebuerger Rapper sech 17 Lidder vun der Séil. Hien hannerfreet, klot un a léisst et knuppen.

FRESHDAX
Lëtzebuergesche Rap

Rap op Lëtzebuergesch ass am Opschwong. Dat mierken och "Freshdax" op hire Concerten. Deen neien Album "Alles beim Alen, Alen" beschäftegt sech mat aktuellen, gesellschaftlechen Aspekter.

Programm

  • Notturno

  • On air

    Virum Dag

  • Moies-Magazin

  • Iwwer Mëtteg

  • Resonanzen

Dossieren

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

  • Literaturfestival "étonnants voyageurs"

    Iwwer de Päischtweekend stoung d'Literatur aus der ganzer Welt, awer och de Film an d'Ausstellungen am Mëttelpunkt an der klenger bretonescher Festungsstiedche Saint Malo.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen