Klassik-CD vun der Woch Spannend, energesch a faarweg

Interpretatioun
Klangqualitéit

Interpret: Philharmoneschen Orchester Lëtzebuerg, Gustavo Gimeno

• Igor Stravinsky: The Rite of Spring
• Igor Stravinsky: Chant funèbre
• Igor Stravinsky: Jeux de Cartes
• Igor Stravinsky: Concerto a Ré
• Igor Stravinsky: Agon

Pentatone PTC5186 650

An der Saison 2016/2017 hat de Philharmoneschen Orchester Lëtzebuerg dem Igor Stravisnky säi "Sacre du Printemps" zu sengem musikalesche Pavillon gemaach. Néng Mol huet den Orchester d'Skandalstéck vun 1913, ee Schlësselwierk aus dem Ufank vum 20. Joerhonnert, an ënnerschiddleche Formater opgefouert. Duerch déi sëllechen Opféierungen ass keng Routine opkomm, wéi een hätt kënne mengen. Den Orchester a säi Chefdirigent hunn e méi déift Versteesdemech fir déi komplex Partitur entwéckelt. Déi Vertrautheet war um Enn staark genuch, fir d'Wierk och op CD opzehuelen.

Rhythmesch schaarf, wéi eng Gillette

Beim Igor Stravinsky definéiert d'Musek sech gréisstendeels iwwert de Rhythmus. Do ass de Risiko natierlech grouss, an deem Ganzen d'Musek ze vernoléissegen oder carrément ze vergiessen. Déi richteg Balance ze fannen tëscht der heiansdo brachialer Gewalt, déi sech am Sacre opdeet, an deene ganz intimen, lyresche Passagen, dat ass den Défi vun dëser Partitur.

De Gustavo Gimeno an den OPL hunn déi Erausfuerderung brilliant gemeeschtert. D'Resultat ass eng ganz lieweg, faarweg a rhythmesch staark Erzielung vun deenen archaesche Riten, déi de Stravinsky a sengem Meeschterwierk illustréiert.

Vun der éischter bis zur leschter Nout ass een als Nolauschterer voll derbäi a matten an deem, wat geschitt. De Gustavo Gimeno hält d'Spannung ëmmer héich - et ass wéi bei engem gudde Buch, dat een net op d'Säit leet, bis ee weess, wéi d'Geschicht ausgeet.

Sprëtzeg an humoristesch

Dat selwecht gëllt - op eng aner Manéier - fir "Jeu de Cartes". Hei sinn et d'Nonchalance, d'Ironie, den humoristeschen Ëmgang mat musikaleschen Zitater a Referenzen, déi de Gustavo Gimeno an den OPL mat vill Genoss, scho bal spilleresch a ganz raffinéiert ënnersträichen. Et spiert ee richteg de Spaass an d'Loscht un där Partitur. Ähnlech lieweg, wibbeleg, musikalesch an op den Dibbelche präzis erliewe mir den Orchester och am Concerto a ré majeur.