Direkter vun der Philharmonie Stephan Gehmacher huet bis 2023 verlängert
Nom Gustavo Gimeno, dem Chefdirigent vum OPL, huet elo och de Stephan Gehmacher, den Direkter vun der Philharmonie a vum OPL, säi Kontrakt verlängert. Hien bleift bis 2023 an der Verantwortung am Concertshaus um Kierchbierg.
Den 1. September 2013 huet de Stephan Gehmacher, fréiere Manager vum Symphonieorchester vum Bayresche Rundfunk, d'Successioun vum Matthias Naske als Direkter vun der Philharmonie iwwerholl. An dës Zäit fält den Ofschloss vum Integratiounsprozess Philharmonie - Philharmoneschen Orchester Lëtzebuerg an och d’Nominatioun vum Gustavo Gimeno als neiem Chefdirigent vum Philharmoneschen Orchester Lëtzebuerg.
Nodeems de Gustavo Gimeno viru kuerzem säi Kontrakt beim OPL bis 2022 verlängert hat, ass et elo de Stephan Gehmacher, dee bis 2023 ënnerschriwwen huet.
"An deenen nächste fënnef Joer geet et drëms, sech fir d'Zukunft ze positionéieren, Saachen unzestoussen an och nach selwer z'erliewen, wéi se un d'Rulle kommen", seet de Stephan Gehmacher dem radio 100,7. D'Philharmonie huet sech nämlech een Entwécklungsplang ginn, deen iwwer néng Joer ugeluecht ass.
Als lescht Etapp vun der organisatorescher Ausriichtung vun der Philharmonie bleift elo nach d'Erneierung vum Verwaltungsrot, deem säi Mandat fir de Summer ausleeft.
Méi zum Thema
De Jérôme Wigny ass neie President
D'Solistes Européens, Luxembourg gi mat engem neie President an déi nei Saison. De Jérôme Wigny iwwerhëlt dës Charge vum Eugène Prim, deen zanter der Grënnung 1989 un der Spëtzt vum Orchester stoung.
Chefdirigent Gustavo Gimeno bleift bis 2022
De Gustavo Gimeno verlängert säi Kontrakt mam OPL. Hie wéilt déi kënschtleresch Weiderentwécklung vum Orchester intensivéieren, seet den Dirigent. Fir déi nächst Jore sinn néng Diske geplangt.
