Album vun der Woch Whitney - Light Upon The Lake

Neil Young meets Stephen Malkmus meets Town Van Zandt: Um éischte Longplayer vu Whitney gëtt mat enger summerlecher Liichtegkeet zitéiert a recycléiert. Trotzdem ass et een altklugen Disk.

Tom Dockal / ys

whitney

Um Pabeier ass "Light Upon The Lake" deen éischten Output vun der jonker Band Whitney. Mee déi zwee Kreativkäpp kommen net aus dem Näischt. Den Julien Ehrlich, deen op der iwwersiichtlecher Geek-Lëscht vu sangende Batteuren net däerf feelen, huet bei Unknown Mortal Orchestra getrommelt. An hien huet zesumme mat där anerer dreiwender Kraaft hannert Whitney, dem Max Kakacek, bei Smith Westerns d'Prestatioun vum musikaleschen Handwierk geliwwert. D'Smith Westerns ginn et net méi. Déi zwee Frënn hunn awer decidéiert, weider zesummen ze musizéieren. "Light Upon The Lake" ass d'Resultat vun där Zesummenaarbecht.

​Éischte richtege Summerdisk

Vun engem Radio-interne Point de vue ass den Disk op zwee Niveauen interessant. Engersäits ass d'Musek wierklech radiotauglech an anerersäits ass et deen éischte richtege Summerdisk. Alles Reflexer, déi ee soss vu kommerzielle Radiosantenne gewinnt ass. Awer an dësem Fall schwätzt dat fir den Disk.

Reng objektiv ass d’Musek alles anescht ewéi brisant oder zäitgeméiss. Mee och dat schwätzt fir dëse ganz amerikaneschen Album, dee seng Virbiller 40 Joer an d’Vergaangenheet siche geet. Awer net nëmmen. Et muss ee sech virstellen, d’Jonge vu Whitney wieren de Stephen "Slacker-Gott" Malkmus mat enger Zäitmaschinn siche gaangen, an hätte mam Neil Young 1974 op der Plage gehaangen. Den Harry Nilsson wier dann owes och nach laanscht luusse komm, an zesummen hätte si sech iwwert dat verkante Genie Townes Van Zandt ënnerhalen an dann de Scorsese-Concertsfilm "The Last Waltz" iwwer The Band gekuckt.

Recyclage an Autofueren

Textlech bleift et einfach gestréckt, mee och dat ass net schlëmm. Et verstäerkt just den Neil-Young-Link, dee regelméisseg an oninspiréierten Amenter vum Autofuere séngt. Oninspiréierten Neil Young ass bekanntlech awer nach ëmmer besser wéi 90 Prozent vun allem soss. A Whitney sangen op engem Lidd och vum Autofueren.

Bei allem Recyclage, à la base widderwäerteger Radiotauglechkeet an aneren iwwerflächlechen, och textleche, Popreflexer, muss gesot ginn: Déi Lässegkeet, déi "Light Upon The Lake" ausstrahlt, kënnt net vun ongeféier. Och wann dem Ehrlich seng Stëmm sou munchem iergendwann géint de Stréch kéint goen, huet een et hei mat enger jonker Band ze doen, déi weess, wat se mécht a wat se wëll. Mat "Light Upon the Lake" proposéiere si ee musikalescht räifen, scho bal altklugen Disk.

An der Mediathéik:

Album vun der Woch / / Tom Dockal
Lauschteren

Méi zum Thema

jamesblake.jpg
Album vun der Woch

Den James Blake ass de Pop-Museker vun der Stonn. Hie kollaboréiert mat bekannte Staren a léist de Rick Rubin um neien Album schrauwen. Trotzdem bleift hie sech op "The Colour in Anything" trei.

ICE IN MY EYES.jpg
Ice in my Eyes

Pop-Pärele "made in Lëtzebuerg": mat hirem neien Album "Diamond" iwwerzeegen "Ice In My Eyes" op ee Neits. An zwar duerch d'Mëschung tëscht enger gewësser Melancholie, a virun allem vill groovegem Sound.

Programm

Net verpassen

  • Suicidegefor am Alter: En Tabuthema

    Suicidegefor am Alter

    Persounen iwwer 75 Joer si besonnesch ufälleg fir sech d'Liewen ze huelen. Eng rezent Campagne fir "Suicidepreventioun am Alter" weist, datt Seniore sech dräi bis véier Mol méi dacks suicidéiere wéi Jonker ënner 25 Joer. E puer vun de Grënn si sozial Isolatioun, Solitude oder Depressiounen.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen