Verkéiersproblematik zu Bréissel De Präis vum Stau

All Joer kaschten d’Verkéiersproblemer ronderëm Bréissel déi Belsch Economie iwwer eng hallef Milliard. Léisungsvirschléi ginn et scho laang. Wa se net ëmgesat ginn, riskéiert d'Situatioun ze kippen.

Georges Kohnen / ys

Analys Stau zu Bréissel um Ring
Stau zu Bréissel um Ring ©Belga

Jiddereen, deen op Bréissel mam Auto schaffe fiert, kennt de Problem: Op de siwen Autobunnen, déi an der belscher Haaptstad zesummelafen, ass all moies an all owes Stau. An op dem deelweis nëmmen zweespurege Contournement, dem sougenannte Ring, ass d’Situatioun net besser. Honnerte Kilometer Stau all Dag. Domat ass d’Belsch laut verschiddene Klassementer mat Bréissel an och Antwerpen am Top Ten vun den am meeschte verstaute Stied op der Welt. Esouguer viru London, Paräis oder Los Angeles. An a ville vun den Autoe sëtzt och nëmmen eng eenzeg Persoun.

Léisungsvirschléi

An déi Situatioun huet och e Präis: iwwer 511 Milliounen Euro pro Joer. Dat hat schonn 2013 d'Bréisseler Chambre de Commerce ausgerechent. An si hunn och deemools scho Léisunge proposéiert: Manner Subside fir Firmenautoen, fir hir Attraktivitéit ze reduzéieren.

  • Méi bëllege Wunnraum am Bréisseler Stadzentrum, fir dass Wunnen an der Staat erëm soll attraktiv ginn.
  • Eng séier Konkretisatioun vum RER, dem Réseau Express Régional.
  • E kohärente Park & Ride Plang.
  • E Peage-System pro gefuerene Kilometer.

Haut, knapps dräi Joer duerno, ass vun dëse Propositiounen nach ëmmer naïscht ze gesinn. Di virécht Regierung hat zwar 2012 d’Avantagen op de Firmenautoe liicht erofgesat. An di aktuell rietsliberal Equipe vum Premierminister Charles Michel huet zesumme mat den dräi Regiounen e Peage fir d’Camionen agefouert, deen am Abrëll wäert funktionell sinn. Mä déi Plooschtere ginn de belschen Entreprise bei wäitem net duer. An d’Situatioun huet sech an de leschten Deeg a Wochen nach zougespëtzt.

D'Situatioun gëtt schlëmmer

Do sinn engersäits d’Tunnellen vun der Petite Ceinture, ronderëm de Stadzentrum vu Bréissel, déi deelweis nach aus den 1950er Jore stamen, an déi no Jorzéngte ouni Entretien aus Sécherheetsgrënn fir de Verkéier gespaart ginn. Nach Mëtt Januar ass e Stéck Beton vum Plafong vun engem Tunnel op d’Fuerbunn gefall. An een Tunnel deen zou ass, dat sinn Zéngdausenden Autoen pro Dag méi am Uewerflächeverkéier.

An anerersäits ass et den RER, de "Réseau Express Régional", deen d’Mobilitéit am ëffentlechen Transport ronderëm Bréissel soll verbesseren. E Projet, dee schonn 1995 annoncéiert gouf, an 2002 sollt konkretiséiert ginn. En Eisebunnsréseau ronderëm d’Haaptstad, wou zwou Millioune Leit wunnen, an all Dag eng weider Millioun Leit schaffe kommen, mä vun deenen nëmmen 20 Prozent den ëffentleche Verkéier huelen, well d’Zich zu Spëtzenzäiten dacks iwwerfält a verspéit sinn. Den Objektiv vum RER war et, dëse Prozentsaz ze verduebelen. Mä eréischt Enn 2015, mat 13 Joer Verspéidung, sinn di éischt Linne vun dësem Réseau opgaang, well d’Budgete fir d’Infrastrukturen ëmmer erëm gekierzt goufen. A wéi dat leider dacks bei eisen Noperen an der Belsch de Fall ass, huet dee ganzen Dossier rezent e communautäre Parfum kritt, well d’Linnen a Richtung Wallonie nach net fäerdeg sinn, an et eventuell ni wäerte sinn.

Et gëllt also elo, séier ze handelen, fir eng komplett Saturatioun vum belsche Verkéiersréseau ze verhënneren. Well dat hätt net nëmmen negativ Konsequenze fir d’Navetteuren, déi all Dag stonnelaang am Stau stinn, mä och fir d’Attraktivitéit an d’Kompetitivitéit vun der Belsch a speziell vu Bréissel. Eng Stad, déi souwisou scho vu gréisseren Entrprisen evitéiert gëtt. Ënnert anerem och wéinst den héije Steieren.

 

An der Mediathéik:

Wirtschaftschronik / / Georges Kohnen
Lauschteren

Méi zum Thema

Autoen
Ekologesch Rotschléi fir den Autosfestival

Brauch een all véier Joer en neien Auto? Oder ass deen Alen nach gutt? Aus ekologesche Grënn sollt ee sech déi Fro virum Autosfestival stellen - seet den Thierry Lagoda vum Oekozenter Pafendall. 

Gilles Dostert.jpg
Mobilitéit

D'Autosfuerer stoungen zejoert am Duerchschnëtt 34 Stonnen am Stau. Den Tram wäert dat verbesseren, seet den Direkter vum Verkéiersverbond.

Programm

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen