Borkenkäfer E klengt Insekt mat grousser Auswierkung

Kuckt een duerch de Bësch, da gesäit een ëmmer méi Fichten, déi verdréchent oder dout ausgesinn. Dofir responsabel ass ënner anerem e ganz klengt heemescht Insekt, de Buchdrucker Borkenkäfer. Hie befält u sech schwaach Beem a spillt esou och eng wichteg Roll am Ekosystem Bësch. Mee duerch déi waarm Temperaturen an d'Dréchent sinn och ëmmer méi gesond, mee geschwächte Beem, zemools Fichte betraff.

Tessy Steffen Koenig / cbi

Buchdruckerborkenkäfer
Foto: Harald Kloth

Schonn dat lescht Joer war duerch d'Dréchent e schwieregt Joer fir d'Fichten. D'Elisabeth Freymann, Forstingenieurin vun der Natur- a Bëschverwaltung (ANF) geet dovun aus, datt et dëst Joer esou viru geet, ewéi dat lescht Joer.

"Mir hunn einfach optimal Wiederkonditioune fir de Borkenkäfer. Hie kann sech gutt vermehren."

De Borkenkäfer ass en heemescht Insekt an u sech en natierleche Bestanddeel vum Ekosystem Bësch. U sech befält hie krank a schwaach Beem. Zu Lëtzebuerg sinn ongeféier eng 50 Borkenkäfer-Aarte bekannt. De Buchdrucker ass deen, dee virun allem Fichte befält.

Fichte kënne keen Haarz produzéieren

Am Fréijoer, wann Temperature vun iwwer 16 Grad am Dag erreecht ginn, fänkt de Borkenkäfer u mat fléien. De männleche Buchdrucker buert sech an d'Schuel vun de Fichten an a leet do sougenannte "Rammelkammeren" un. Weibercher ginn ugelackelt, begatt a leeën dann 20 bis 80 Eeër an déi Kummeren.

D'Larwe kommen eng bis zwou Wochen duerno aus den Eeër eraus a friesse sech dann ënnert der Schuel vun der Ficht, am Bast duerch. No dräi bis sechs Woche verpoppe si sech a ginn zu jonke Käferen.

Bei staarkem Befall kann de Waassertransport bis an d'Kroun vun de Fichten ënnerbrach ginn. Dat ass hiert Doudesuerteel.

Am Normalfall wiert sech eng Ficht duerch hir Haarzproduktioun géint de Borkenkäfer, deen am haarz géif erdrénken.

"Opgrond vun der Dréchent konnten d'Fichten net genuch Haarz produzéieren an doduerch ass hiren natierlechen Ofwiermechanismus gestéiert," seet d'Elisabeth Freymann vun der ANF.

Dat hätt och en ekonomeschen Impakt. D'Ficht gëtt virun allem als Constructiounsholz genotzt. Och nom Befall kann een d'Holz nach notzen, mee d'Industrie "hätt gär frëscht Holz a bezilt och méi dofir."

"De Präis ass staark an de Keller gaangen"

Donieft wier de Marché den Ament mat Fichtenholz iwwerlaf, seet d'Forstingenieurin. De Problem mam Buchdrucker-Borkenkäfer géif et mëttlerweil a ganz Mëtteleuropa ginn.

"D'Lageren si voll mat Fichtenholz an de Präis ass staark an de Keller gaangen."

Et wéilt een de Buchdrucker net bekämpfen oder ausrotten, well "et e Bestanddeel vun eisem Bëschekosystem ass." Wann een awer e Befall a senge Fichtebestänn feststellt sollt ee séier reagéieren.

"D'Holz aschloen an esou séier, ewéi méiglech aus dem Bësch eraushuelen, fir datt sech de Buchdrucker net weider reproduzéiere kann."

D'Fichte kéimen och dacks a Monokulture fir. "Eng Monokultur ass u sech ëmmer méi vulnerabel."

"Mir brauche méi Mëschkulturen an de Bëscher"

Vun de Monokulture misst een ewech kommen an op méi Mëschkulture setzen. Et bräicht een en naturnoe Bësch mat ënnerschiddleche Generatiounen a standuertgerecht geplanzte Baamaarten.

D'Naturverwaltung huet elo eng Broschür erausginn, mat Recommandatioune fir de Borkenkäfer an de Bëscher ze managen, wéi ee soll handelen, wann een e Befall feststellt an Informatiounen iwwert de gesetzleche Kader.

Dës Broschür kann op www.emwelt.lu erofgeluede ginn.

An der Mediathéik:

Aktuelles / / Tessy Steffen Koenig
Lauschteren

Méi zum Thema

Seniorewunngemeinschaft
Éischte participative Wunnprojet zu Luerenzweiler fir Senioren

Iergendwann am Liewe stelle sech eng Partie Leit d'Fro, wéi si wëlle liewen, wa si méi al sinn. A fir vill vun hinnen ass et keng Optioun an en Altersheem ze goen. Wéi eng Alternative ginn et?

Marc Thiel
Urban Flächen

De Gemengesyndikat SIAS an hir biologesch Statioun huet virun zwee Joer e Projet lancéiert, bei deem urban Flächen ekologesch opgewäert ginn. Dat ënner anerem duerch Fauchage tardif oder Blummewisen.

Verantwortung
Gemeinwohl-Ökonomie

D'Asbl Gemeinwohl-Ökonomie setzt sech fir en ethesche Wirtschaftsmodell am Grand-Duché an. Hei sti virop ekologesch a sozial Prinzipien am Mëttelpunkt. De Modell cibléiert virun allem Entreprisen.

Milena Steinmetzer
Straight Edge Beweegung

An de 70er hu sech jonk Leit zesumme gedoe fir en Zeeche géint den Drogekonsum ze setzen. Dat war den Ufank vun der Straight Edge Bewegung. D'Milena Steinmetzer lieft zanter ronn fënnef Joer nom Motto "Straight Edge".

Praktesch Infoen

  • 4.6. Generatiounen

    4.6. Generatiounen

    Kiischten a Waasser, Energie am Iessen, de Roger Quaino an d'Operett "Gräfin Mariza"

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen