Muschelstatioun op der Kaalber Millen Eng "flagship species" an eise Gewässer

Op der Kaalber Mille gi fir de LIFE Flosspärelmuschelprojet Muschele geziicht, déi da spéider am Floss Our kënnen ausgesat ginn. Op der Our gëtt versicht, d'Flosspärelmuschel an d'Baachmuschel mat hire komplexe Liewenszyklen ze zillen, hiert Habitat ze verbesseren an d'Populatioun ze kontrolléieren.

Tessy Steffen Koenig / cz

Frank Thielen Muschelstatioun.JPG
De Frank Thielen vun der Fondatioun natur & ëmwelt an der Muschelstatioun zu Kaalber

D'Flosspärelmuschel ass zu Lëtzebuerg praktesch komplett verschwonnen, seet de Frank Thielen, deen zanter bal zéng Joer fir d'Fondatioun natur & ëmwelt schafft.

Wéi d'Flosspärelmuschel gouf et och d'Baachmuschel fréier heefeg, virun allem am Éislek, awer och soss am Land.

Verflicht, d'Aarten ze schützen

D'Baachmuschel gëtt et nach an zwee Gewässer, an der Uewersauer an an der Our. Soss ass och si praktesch ausgestuerwen.

"Béid Aarte sinn op europäeschem Niveau geschützt. All Land ass u sech verflicht, Aktiounen duerchzeféieren, fir déi zwou Aarte virum komplette Verschwannen ze schützen."

Beim Frank Thielen op der Muschel-Statioun op der Kaalber Mille gëtt versicht, d'Aarten zeréckzehuelen.

D'Muschelen ginn numeréiert fir kënnen ze kontrolléieren, wéi si sech entwéckelen

Déi zwou Muschelaarte späize kleng Larven eraus, déi ee Glochidien nennt. Déi Larve musse sech op d'Kieme vun engem Wirtfësch festsetzen.

"D'Flosspärelmuschel ass un eis heemesch Baachfrell gekoppelt. Bei der Baachmuschel ginn et méi Fëschaarten, mee mir schaffen hei mat der europäescher Ellchen."

Wann d'Muschele vun de Kiemen eroffalen, si si tëscht 0,2 an 0,4 Zentimeter grouss.

Wichteg Funktioun fir den Ekosystem

Et ass also wichteg, datt et dem Fësch gutt geet, fir datt et och der Muschel gutt geet. Et kann een hei net wierklech vun enger Symbios schwätzen, well d'Fësch esou direkt näischt vun der Muschel hunn, déi sech op hir Kieme festsetzt, seet de Frank Thielen.

"Fréier, wéi eis Gewässer nach gutt Populatioune vu Séisswaassermuschelen haten, hu si eng ganz wichteg Funktioun fir den Ekosystem gespillt. Si hunn d'Waasser gefiltert. Dat koum natierlech och de Fësch zegutt."

D'Muschelen hu fréier och dozou bäigedroen, datt de Kies relativ propper bliwwen ass, esou nach de Frank Thielen vun natur & ëmwelt.

"Do konnten d'Forellen an d'Ellchen also gutt läichen."

D'Larven vun de Muschele setze sech op d'Kieme vun de Fësch a falen dann iergendwann erof

Duerch eis intensiv Landnotzung, sief et duerch d'Landwirtschaft, Forstwirtschaft awer och aus de Gemengen oder vu Privatleit kënnt ze vill Feinsediment (kleng Toun a Lehmpartikelen) an eis Gewässer, seet de Frank Thielen.

"Déi verstoppen a verschlammen dat ganzt Lückesystem."

Déi kleng Muschele wieren dowéinst dacks agaangen, an déi al hunn iwwerlieft.

"Et si keng Kanner méi nokomm. Iergendwann ware just nach Bomen a Bopen do. An do war et eben eriwwer."

De Projet vun der Flosspärelmuschel ass vun 2005 bis 2011 gaangen. Iwwer 500 Muschele konnten do nogezillt ginn. Si sinn an engem Floss an der Eifel ausgesat ginn, well de Floss Our nach net propper genuch ass, fir d'Muschelen direkt do auszesetzen.

An der Muschelstatioun zu Kaalber gi Flosspärelmuschelen a Baachmuschele geziicht

Vill mëttelméisseg Gewässer

Bei der Baachmuschel konnten iwwer 2.000 Déiere fir all Flooss nees ausgesat ginn.

Déi ursprénglech Populatioun an der Our ass ëm déi 15.000 Muschelen grouss, an der Sauer läit si ongeféier bei 14.000.

"D'Muschel ass eng sougenannt 'flagship species' respektiv eng Indikatoraart, dat heescht, wa si do ass, weist si, datt den Ekosystem Floss mat sengem Anzuchsgebitt an engem gutt geréierten Zoustand ass."

Der Wasserrahmenrichtlinie no hu mir zu Lëtzebuerg vill mëttelméisseg Gewässer, esou nach de Frank Thielen. Mee déi gutt respektiv déi ganz gutt, géife bal ganz feelen.

D'Mammemuschelen späizen d'Larven eraus, déi sech herno op d'Kieme vun de Fësch setzen

Muschele filteren d'Waasser

E gudden Deel vun eisem Drénkwaasser kënnt aus der Sauer, wou déi Muschele fréier och dra gelieft hunn. D'Muschele géifen eis allerdéngs weisen, datt d'Waasser "net méi ganz optimal" wier. D'Muschel kann hëllefen, d'Waasser ze filteren.

"Wa mir d'Gestioun vun eisem Anzuchsgebitt verbessert kréien, manner Verschmotzung an eise Gewässer ass, an d'Muschelen doduerch och zeréckkommen, spuere mir eis doduerch vill Sue beim Proppermaache vun Drénkwaasser."

De Frank Thielen schafft zënter ronn zéng Joer fir d'Fondatioun natur & ëmwelt

An der Mediathéik:

Aktuelles / / Tessy Steffen Koenig
Lauschteren

Méi zum Thema

Christian Ries am Gronn.JPG
Friem Aarten

Neobita, also Aarten, déi an eise Regiounen net heemesch sinn, kënnen eisen Ekosystem schiedegen a geféierlech fir déi biologesch Diversitéit sinn. Anerer kënnen eng Beräicherung fir eis Fauna a Flora sinn.

Bloalgen um Stauséi
Waasserschutz

Um Stauséi sollen zousätzlech restriktiv Waasserschutzmoossnamen an der Landwirtschaft gëllen. D'Gemengen an d'Landwirtschaftskammer kritiséieren déi nei Oploen. D'Ëmweltministesch wëllt zesummen no Léisunge sichen.

Wassersprinkler
D'Drénkwaasser an Zäite vun Dréchent

Dat waarmt Wieder beaflosst d'Drénkwaasserversuergung, seet d'Waasserverwaltung. Laangfristeg hannerléisst awer och de Klimawiessel do déifgräifend Spuren, zum Beispill um Niveau vum Grondwaasser.

Bloalgen um Stauséi
Ëmwelt

Joreszäit, Dünger, Pestiziden a Klimawandel droen zur staarker Entwécklung vun de Bloalgen am Stauséi bei. Nei Waasserschutzzone géinge Bloalge reduzéieren, seet den Ëmweltmikrobiolog Christian Penny.

Programm

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen